តម្លៃប្រេងអន្តរជាតិ ធ្លាក់ចុះដល់កម្រិតទាប មិនធ្លាប់មានក្នុងរយៈពេល៤សប្តាហ៍ 

កាលពីថ្ងៃពុធ តម្លៃប្រេងបានធ្លាក់ចុះដល់កម្រិតទាបមិនធ្លាប់មានក្នុងរយៈពេល៤សប្តាហ៍ បន្ទាប់ពីស្តុកប្រេងឆៅរបស់សហរដ្ឋអាមេរិក បានកើនឡើងលើសពីការរំពឹងទុក។

ប្រេងឆៅម៉ាក Brent បានធ្លាក់ចុះ ២.៧៣ ដុល្លារឬ ៣,២% មកនៅ ៨១.៩៩ ដុល្លារក្នុងមួយបារ៉ែល ខណៈប្រេងឆៅម៉ាក US West Texas Intermediate (WTI) បានធ្លាក់ចុះ ៣.០៥ដុល្លារ ឬ ៣,៦% មកនៅ ៨០.៨៦ដុល្លារក្នុងមួយបារ៉ែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នោះគឺជាការធ្លាក់ចុះភាគរយប្រចាំថ្ងៃដ៏ធំបំផុត សម្រាប់ម៉ាកទាំងពីរចាប់តាំងពីដើមខែសីហាមក និងជាការធ្លាក់ចុះទាបបំផុតសម្រាប់ម៉ាក Brent ចាប់តាំងពីថ្ងៃទី៧ខែតុលា និងសម្រាប់ម៉ាក WTI ចាប់តាំងពីថ្ងៃទី១៣ខែតុលាមក។

ស្តុកប្រេងឆៅប្រចាំសប្តាហ៍ បានកើនឡើងជាង ៣.៣លានបារ៉ែល ច្រើនជាងការរំពឹងទុក ប៉ុន្តែស្តុកប្រេងសាំងបានធ្លាក់ចុះដល់កម្រិតទាបបំផុតចាប់តាំងពីខែវិច្ឆិកាឆ្នាំ ២០១៧មក។

លោក Phil Flynn អ្នកវិភាគនៅក្រុមហ៊ុន Price Futures Group ក្នុងទីក្រុង Chicago បាននិយាយថា “ទីផ្សារបានស្ថិតនៅក្រោមសម្ពាធរួចទៅហើយ។ យើងធ្លាក់ចុះដោយសារតែការទាញយកប្រាក់ចំណេញពីកិច្ចប្រជុំរបស់សហព័ន្ធ”។

ថ្លែងក្នុងកិច្ចប្រជុំកំពូលស្តីពីអាកាសធាតុពិភពលោក COP26 នៅទីក្រុង Glasgow ប្រធានាធិបតីសហរដ្ឋអាមេរិក លោក Joe Biden បានស្តីបន្ទោសការកើនឡើងនៃតម្លៃប្រេង និងឧស្ម័ន លើការបដិសេធរបស់បណ្តាប្រទេស OPEC ក្នុងការបូមប្រេងឆៅបន្ថែមទៀត។

អង្គការនៃប្រទេសនាំចេញប្រេង និងសម្ព័ន្ធមិត្តរបស់ខ្លួន ដែលជាក្រុមត្រូវបានគេស្គាល់ថា OPEC+ បានជួបប្រជុំគ្នានៅថ្ងៃព្រហស្បតិ៍នេះ ហើយត្រូវបានគេរំពឹងថានឹងបញ្ជាក់ឡើងវិញនូវផែនការដើម្បីរក្សាការផ្គត់ផ្គង់ប្រចាំខែឲ្យមានស្ថិរភាព៕

ប្រែសម្រួល៖ Vann Vann

ប្រភព៖ Reuters

ចុចអាន៖ ឃើញប្រេងសាំងឡើងថ្លៃកុំឆ្ងល់! នេះជាមូលហេតុ