អគារក្រសួងមហាផ្ទៃថ្មី ចំណាយថវិកាជាង ៦០លានដុល្លារបើកការដ្ឋានសាងសង់ព្រឹកនេះ

អគារទីស្ដីការ ក្រសួងមហាផ្ទៃថ្មីដែលនៅទីតាំងចាស់ បានបើកការដ្ឋានសាងសង់នៅព្រឹកថ្ងៃទី១១ ខែវិច្ឆិកា ឆ្នាំ២០២១នេះ ដោយចំណាយថវិកា ប្រមាណជា ៦០លានដុល្លារ។ នេះបើតាមការបញ្ជាក់របស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា។

ថ្លែងនៅក្នុងពិធីសម្ពោធទីស្តីការ នៃអគារក្រសួងរៀបចំដែនដី នគររូបនីយកម្ម និងសំណង់ កាលពីថ្ងៃទី៨ ខែវិច្ឆិកា ឆ្នាំ២០២១ សម្ដេចតេជោ ហ៊ុន សែន មានប្រសាសន៍ថា «តាមខ្ញុំសួរ សម្ដេចក្រឡាហោម ស ខេង គឺនៅថ្ងៃទី១១ ខាងមុខនេះ នឹងធ្វើពិធីបញ្ចុះបឋមសីលា កសាងក្រសួមហាផ្ទៃថ្មីដែលនឹងត្រូវចំណាយថវិកា ប្រមាណ៦០លានដុល្លារអាមេរិក ឯណោះ គឺមានថវិការួចស្រេចទៅហើយ ដើម្បីនឹងកសាងអគារថ្មីនេះ»។

សូមបញ្ជាក់ថា អគារក្រសួងមហាផ្ទៃថ្មីសាងសង់លើទីតាំងចាស់នេះ ស្ថិតនៅវិថីព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ៕

អត្ថបទ៖ ទួន សុផល