ភ្ញៀវទេសចរទៅលេងខេត្តកំពតជិត ១លាននាក់ រយៈពេល ១០ខែឆ្នាំនេះ

ខេត្តកំពត គឺជាខេត្តគោលដៅទេសចរណ៍ដ៏សំខាន់មួយជាប់មាត់សមុទ្ររបស់កម្ពុជា។ ខេត្តកំពតមានតំបន់ទេសចរណ៍ជាច្រើន ទាក់ទាញភ្ញៀវទៅកម្សាន្តរៀងរាល់សប្តាហ៍។

លោក សយ ស៊ីណុល ប្រធានមន្ទីរទេសចរណ៍ខេត្តកំពត បានឲ្យកម្ពុជាថ្មីដឹងនៅថ្ងៃសុក្រនេះថា រយៈពេល១០ខែ ឆ្នាំ ២០២១នេះ ខេត្តកំពតទទួលបានភ្ញៀវទេចរទាំងជាតិ និងអន្តរជាតិជិត ១លាននាក់ មកទស្សនាកម្សាន្តខេត្តជាប់មាត់សមុទ្រមួយនេះ។

លោក ស៊ីណុល បានបញ្ជាក់បន្ថែមថា ត្រឹមតែរយៈពេល១សប្តាហ៍ប៉ុណ្ណោះ មានភ្ញៀវទេសចរទៅលេងខេត្តកំពតជាមធ្យមចន្លោះចំនួនពី ១៧០០០នាក់ ទៅជាង ២០០០០ម៉ឺននាក់។​ លោកបានឲ្យដឹងទៀតថា នៅអំឡុងពេលភ្ជុំបិណ្យកន្លងទៅនេះ ខេត្តកំពតទទួលបានភ្ញៀវទេសចរជាង ១៤ម៉ឺននាក់។

លោកប្រធានមន្ទីរទេសចរណ៍បានគូសបញ្ជាក់ថា ភ្ញៀវទេសចរចាប់ផ្តើមចេញដើរកម្សាន្តចាប់ពីរាជរដ្ឋាភិបាល បិទបញ្ចប់យុទ្ធនាការប្រយុទ្ធប្រឆាំងជំងឺកូវីដ-១៩ បាន១សប្តាហ៍។

ជាមួយគ្នានេះ លោក គឹម ចាន់សុភា អ្នកគ្រប់គ្រងផ្ទះសំណាក់មុលីដឺរីវើ ខេត្តកំពត បានឲ្យដឹងថា ភ្ញៀវទេសចរចាប់ផ្តើមកើនឡើងវិញជាបន្តបន្ទាប់។ ជាក់ស្តែងផ្ទះសំណាក់របស់លោកមានអ្នកជួលស្នាក់នៅជាបណ្តើរៗហើយ ជាពិសេសនៅថ្ងៃចុងសប្តាហ៍ គឺមានច្រើន។ នៅក្នុងបរិបទដែលភ្ញៀវទេសចរចាប់ផ្តើមចេញកម្សាន្តឡើងវិញនេះ លោក ចាន់សុភា អះអាងថា លោកមិនភ្លេចបង្កើនការការពារជំងឺឆ្លងកូវីដ-១៩នោះទេ ពោលគឺមានដាក់ឧបករណ៍វាស់កំដៅ ដបអាល់កុល និងពិនិត្យកាតវ៉ាក់សាំងរាល់ការចេញចូល ដើម្បីការងារទាំងសុវត្ថិភាពភ្ញៀវ និងសុវត្ថិភាពខ្លួនឯងផង។

សូមបញ្ជាក់ថា ក្រោយពីរាជរដ្ឋាភិបាល បានសម្រេចបើកសេដ្ឋកិច្ច និងទីតាំងកម្សាន្តនានា នៅទូទាំងប្រទេសឡើងវិញ បន្ទាប់ពីកម្ពុជា បានចាក់ចាក់វ៉ាក់សាំងដល់ពលរដ្ឋគ្រប់ចំនួនកំណត់ ហើយការឆ្លងរីករាលដាលមានការធ្លាក់ចុះ ប្រជាពលរដ្ឋ បានចេញដើរកម្សាន្តតាមរមណីយដ្ឋាននានាគ្រប់ទីកន្លែង ពិសេសនៅតំបន់គោលដៅទេសចរណ៍មួយចំនួនដូចជា ខេត្តកំពត កែប សៀមរាប ព្រះសីហនុ និងខេត្តមណ្ឌលគិរីជាដើម៕

អត្ថបទ៖ ទួន សុផល