២ថ្ងៃចុងសប្តាហ៍៖ ភ្ញៀវទេសច​រជិត ២០ម៉ឺននាក់ដើរកម្សាន្តទូទាំងប្រទេស

លោក តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានឲ្យកម្ពុជាថ្មីដឹងថា រយៈពេល២ថ្ងៃ គឺថ្ងៃទី ១៣-១៤ ខែ វិច្ឆិកា(សៅរ៍-អាទិត្យ) មានភ្ញៀវទេសចរដើរកម្សាន្តទូទាំងប្រទេសកម្ពុជា ប្រមាណជាង ១៨ម៉ឺននាក់។ ក្នុងនោះភាគច្រើនភ្ញៀវជាតិ និងភ្ញៀវបរទេសផ្ទៃក្នុង(ជនបរទេសកំពុងស្នាក់នៅកម្ពុជា) មានប្រមាណជិត ៥ពាន់នាក់។

លោក តុប សុភ័ក បានបន្តដូច្នេះថា« ក្នុងថ្ងៃចុងសប្តាហ៍២ថ្ងៃ ដែលមានភ្ញៀវទេសចរដើរកម្សាន្តនេះ ភាគច្រើនគឺទៅតំបន់សមុទ្រ ក្នុងនោះមានខេត្តព្រះសីហនុ ច្រើនជាងគេ បន្ទាប់មករាជធានីភ្នំពេញ ខេត្តកំពត ខេត្តសៀមរាប និងខេត្តពោធិ៍សាត់»។

ក្រៅពីខេត្តគោលដៅដែលមានទេសចរទៅកម្សាន្តច្រើនជាងគេនេះ នៅមានខេត្តមួយចំនួនទៀត នៅតំបន់ភាគឦសាន ដូចជា ខេត្តរតនគិរី មណ្ឌលគិរី ក្រចេះ ស្ទឹងត្រែង ក៏មានភ្ញៀវទេសចរទៅកម្សាន្តផងដែរ។ នេះបើតាមការបញ្ជាក់របស់លោក តុប សុភ័ក៕

អត្ថបទ៖ ទួន សុផល