ព័ត៌មានអន្ដរជាតិ

តម្រូវការប្រេងសាំងនៅ ថៃ វិលទៅរកកម្រិតដូចពេលមុនផ្ទុះ កូវីដ

បានផុស

៣ years មុន

នៅ

ថ្ងៃអង្គារ ១៦ វិច្ឆិកា ២០២១

ដោយ

ក្រុមហ៊ុន Thai Oil Plc (TOP) ដែលជារោងចក្រចម្រាញ់ប្រេងដ៏ធំបំផុតរបស់ប្រទេសថៃជឿជាក់ថា តម្រូវការប្រេងឥន្ធនៈក្នុងស្រុកបានចាប់ផ្តើមត្រឡប់ទៅរកកម្រិតដូចកាលមុនរោគរាតត្បាតកូវីដ ១៩ លើកលែងតែប្រេងឥន្ធនៈយន្តហោះប៉ុណ្ណោះ ពោលការប្រើប្រាស់នេះរំពឹងថា នឹងត្រលប់មកធម្មតាវិញនៅចុងឆ្នាំក្រោយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមការប៉ាន់ស្មានរបស់ TOP បានឲ្យដឹងថា តម្រូវការប្រេងសាំងមានលើសពី ៣០ លានលីត្រក្នុងមួយថ្ងៃ ហើយនឹងកើនឡើង ៨ ភាគរយនៅឆ្នាំក្រោយ ខណៈដែលការប្រើប្រាស់ប្រេងម៉ាស៊ូតមានច្រើនជាង ៦៥ លានលីត្រក្នុងមួយថ្ងៃ ដែលជាកម្រិតដូចគ្នាមុនពេលកូវីដវាយប្រហារប្រទេសថៃក្នុងឆ្នាំ ២០២០ ។ តម្រូវការប្រេងម៉ាស៊ូតទំនងជាកើនឡើង ៥.៤ ភាគរយនៅឆ្នាំក្រោយ ។

តំរូវការប្រេងឥន្ធនៈមានកម្រិតលើសពី ៥ លានលីត្រក្នុងមួយថ្ងៃ ពោលប្រហាក់ប្រហែលនឹងការប្រើប្រាស់ជាមធ្យមក្នុងឆ្នាំ ២០១៩ ហើយវាត្រូវបានគេរំពឹងថានឹងកើនឡើង ២.៣ ភាគរយនៅឆ្នាំក្រោយ ។

លោក Nuttapol Nopparatwong អ្នកគ្រប់គ្រងក្រុមហ៊ុន TOP សម្រាប់ទំនាក់ទំនងវិនិយោគិនបាននិយាយថា ចំពោះប្រេងឥន្ធនៈយន្តហោះវិញ ការប្រើប្រាស់ត្រូវបានគេរំពឹងថានឹងមានជិត ២០ លានលីត្រក្នុងមួយថ្ងៃនៅចុងឆ្នាំក្រោយ បើធៀបទៅវាតិចជាង ១០ លានលីត្រក្នុងមួយថ្ងៃកាលពីដើមឆ្នាំនេះ និងតិចជាង ៥ លានលីត្រក្នុងមួយថ្ងៃក្នុងត្រីមាសទី ៣ នៃឆ្នាំនេះ ។

លោកបានបន្តថា “ការប្រើប្រាស់ប្រេងយន្តហោះនឹងត្រូវចំណាយពេលយូរដើម្បីស្តារឡើងវិញ ខណៈដែលការធ្វើដំណើរតាមផ្លូវអាកាសបន្តនៅគ្រប់ប្រទេសទាំងអស់ ។ តម្លៃប្រេងនៅឌូបៃនឹងស្ថិតនៅជាមធ្យម ៧០ ដុល្លារអាមេរិកក្នុងមួយបារ៉ែលនៅឆ្នាំក្រោយ ដែលបង្ហាញពីតុល្យភាពនៃការផ្គត់ផ្គង់ និងតម្រូវការប្រេងពិភពលោក” ។

ទន្ទឹមនោះ ទីភ្នាក់ងារថាមពលអន្តរជាតិប៉ាន់ប្រមាណថា តម្រូវការប្រេងនឹងកើនឡើងដល់ ១០១.៣ លានបារ៉ែលក្នុងមួយថ្ងៃនៅឆ្នាំក្រោយ ពោលកើនឡើងពី ៩៥.៩ លានបារ៉ែលក្នុងមួយថ្ងៃ ។

ស្របពេលជាមួយគ្នានេះ ការផ្គត់ផ្គង់ប្រេងក៏ត្រូវបានគេរំពឹងថានឹងកើនឡើងដែរ ដោយមានប្រេងឆៅថ្មីបន្ថែម ០.៤ លានបារ៉ែលក្នុងមួយថ្ងៃពីអង្គការនៃប្រទេសនាំចេញប្រេង និង ២ លានបារ៉ែលក្នុងមួយថ្ងៃពីសហរដ្ឋអាមេរិក កាណាដា និងប្រេស៊ីល ។

TOP កាលពីថ្ងៃចន្ទបានរាយការណ៍ថា ខ្លួនបានបែងចែកការចំណាយដើមទុនដែលមានតម្លៃ ២.២៤៨ ពាន់លានដុល្លារសម្រាប់ប្រើប្រាស់ក្នុងចន្លោះឆ្នាំ ២០២១ និង ២០២៤ ហើយថវិកាភាគច្រើននឹងផ្ដល់ទៅគម្រោងថាមពលស្អាត និងការកែលម្អផលិតភាព ខណៈក្រុមហ៊ុនក៏មានគម្រោងកាត់បន្ថយចំណាយប្រតិបត្តិការរបស់ខ្លួនផងដែរ ៕