ពលរដ្ឋប្រមាណជាង៥ម៉ឺននាក់កម្សាន្តមុខព្រះបរមរាជវាំងថ្ងៃទី២នៃពិធីបុណ្យអុំទូក

បើគិតត្រឹមម៉ោង ១៧និង០០នាទីល្ងាចនៃព្រះរាជពិធីបុណ្យអុំទូកទី២ មានប្រជាពលរដ្ឋ ប្រមាណជាង៥ម៉ឺននាក់បានមកលេងកម្សាន្តតាមបណ្តោយសួនច្បារនានា ពិសេសសួនច្បារ មុខព្រះបរមរាជវាំង បើធៀបនឹងថ្ងៃទី១ ឃើញថា មានការកើនឡើងគុណនឹងពីរ។ នេះបើតាមការបញ្ជាក់របស់លោក សុខ ពេញវុធ អភិបាលនៃគណៈអភិបាលខណ្ឌដូនពេញបានមាន នៅព្រឹកថ្ងៃទី ២០ខែវិច្ឆិកាឆ្នាំ ២០២១នេះ។

លោកអភិបាលខណ្ឌដូនពេញបានបន្តទៀតថា ក្នុងនោះ សាលារាជធានីភ្នំពេញ ក៏បានសម្រេច បិទផ្លវលេខ ១៤៤ ដល់ ២៤០ ជុំវិញព្រះបរមរាជវាំង ដើម្បីមានទីធ្លាធំទូលាយ សម្រួលដល់ការដើរលេងកម្សាន្តរបស់បងប្អូនប្រជាពលរដ្ឋផងដែរ ។

ជាមួយគ្នានោះដែររដ្ឋបាលខណ្ឌដូនពេញ ក៏ស្នើឲ្យប្រជាពលរដ្ឋ ដែលមកលេងកម្សាន្តក្នុងពិធីបុណ្យអុំទូកត្រូវបន្តអនុវត្តជាប្រចាំនូវវិធានការ ៣កុំ ៣ការពារ  តាមប្រសាសន៍ ដឹកនាំដ៏ខ្ពង់ខ្ពស់ របស់រាជរដ្ឋាភិបាលកម្ពុជា ដើម្បីបង្ការទប់ស្កាត់ជំងឺកូវីដ-១៩ និងសូមឲ្យប្រជាពលរដ្ឋរក្សាទុកដាក់សំរាម ឲ្យបានត្រឹមត្រូវចូលធុងសំរាម ដែលរៀបចំដោយក្រុមហ៊ុន ដើម្បីងាយស្រួលប្រមូលដឹកជញ្ជូនចេញ៕ រស្មី