កម្ពុជាពង្រីកទីផ្សារនាំចេញ តាម​​រយៈ​កិច្ចព្រមព្រៀងពាណិជ្ជកម្ម​សេរីចំនួន៣

ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោ ហ៊ុន សែន បានប្រាប់វេទិកាសេដ្ឋកិច្ចនិងធុរកិច្ចអាស៊ី-អ៊ឺរ៉ុបលើកទី ១ ថា ប្រទេសកម្ពុជាបានពង្រីកទីផ្សារនាំចេញកាន់តែទូលំទូលាយ តាមរយៈការបង្កើតកិច្ចព្រមព្រៀងពាណិជ្ជកម្មសេរីនានាដែលចូលជាធរមាននាពេលឆាប់ៗខាងមុខ។

សម្តេចអគ្គមហាសេនាបតីតេជោ ហ៊ុន សែន បានលើកទស្សននេះនៅក្នុងពិធីបើកវេទិកាសេដ្ឋកិច្ចនិងធុរកិច្ចអាស៊ី-អ៊ឺរ៉ុបលើក​ទី១ ​ក្រោមមូលបទ: «ការផ្លាស់ប្តូរទៅគន្លងប្រក្រតីភាពថ្មី៖ការលើកកម្ពស់ការចូលរួមក្នុងខ្សែច្រវាក់តម្លៃសកលពហុភាគីនិយម និង បដិវត្តន៍ឧស្សាហកម្មទី៤”ថ្ងៃទី ២៤ ខែ វិច្ឆិកា ឆ្នាំ ២០២១ តាមរយៈប្រព័ន្ធវីដេអូ។

សម្តេចតេជោនាយករដ្ឋមន្រ្តីបានលើកឡើងថា រាជរដ្ឋាភិបាលបានពង្រីកទីផ្សារនាំចេញកាន់តែទូលំទូលាយតាមរយៈការបង្កើតនូវកិច្ចព្រមព្រៀងពាណិជ្ជកម្មសេរីនានាក្នុងនោះរួមមាន៖

(១) កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)
(២) កិច្ចព្រមព្រៀងពាណិជ្ជកម្មសេរីកម្ពុជា-ចិន
(៣) កិច្ចព្រមព្រៀងពាណិជ្ជ កម្មសេរីកម្ពុជា-កូរ៉េដែលនឹងចូលជាធរមាននាពេលឆាប់ៗខាងមុខ

ជារួមការវិវត្តជាវិជ្ជមានទាំងនេះបានកំពុងប្រែក្លាយកម្ពុជាឱ្យទៅជាទីតាំងផលិតកម្ម ធុរកិច្ច និងវិនិយោគមួយកាន់តែសំខាន់និងមានសក្ដានុពលនៅក្នុងតំបន់ហើយមានទីផ្សារនាំចេញកាន់តែធំ ប្រកបដោយភាពប្រកួតប្រជែងសម្រាប់វិនិយោគិនពីគ្រប់មជ្ឈដ្ឋានជាពិសេសពីតំបន់អ៊ឺរ៉ុប។

ក្នុង​ឱកាស​នោះដែរ សម្តេចតេជោនាយករដ្ឋមន្រ្តីបានជម្រាបជូនអង្គប្រជុំដោយសង្ខេបអំពីស្ថានភាពនៃជំងឺកូវីដ-១៩នៅកម្ពុជា។ ជាមួយនឹងការគ្រប់គ្រងបានល្អនូវស្ថាន ភាពជំងឺកូវីដ-១៩ គិត​ត្រឹមថ្ងៃទី ១៨ ខែវិច្ឆិកា ឆ្នាំ ២០២១ នេះរាជរដ្ឋាភិបាលសម្រេចការចាក់វ៉ាក់សាំងបានក្នុងអត្រាជាង ៨៨% នៃចំនួនប្រជាជនក្នុងប្រទេសសរុប ១៦ លាននាក់។ រាជរដ្ឋាភិបាលកម្ពុជាកំពុងខិតខំរៀបចំនិងដាក់ឱ្យអនុវត្តវិធានការគោលនយោបាយច្បាស់លាស់ ដើម្បីទាក់ទាញការវិនិយោគបរទេស បន្ថែមទៀតតាមរយៈការកសាងហេដ្ឋារចនាសម្ព័ន្ធនិងការកែលម្អប្រព័ន្ធដឹកជញ្ជូនទាំងផ្នែកទន់និងរឹងការលើកកម្ពស់កិច្ចសម្រួលពាណិជ្ជកម្មការអភិវឌ្ឍធនធានមនុស្សការ រៀបចំប្រព័ន្ធ-បច្ចេកវិទ្យាព័ត៌មាននិងឌីជីថលនិងការអភិវឌ្ឍវិស័យហិរញ្ញវត្ថុ៕

អត្ថបទ៖ណារី