ព័ត៌មានអន្ដរជាតិ

២៣ ឆ្នាំទៀតទើបផ្លូវដែក ឡាវ-ចិន រកបានប្រាក់ចំណេញ

បានផុស

៣ years មុន

នៅ

ថ្ងៃអង្គារ ២៨ ធ្នូ ២០២១

ដោយ

យោងតាមក្រសួងផែនការ និងវិនិយោគឡាវបានឲ្យដឹងថា ផ្លូវដែកឡាវ-ចិន នឹងប្រើពេលរហូតដល់ ២៣ ឆ្នាំ ទើបទទួលបានប្រាក់ចំណេញ ខណៈវិទ្យុជាតិឡាវ (LNR) បានរាយការណ៍ថា គម្រោងនេះមានតម្លៃវិនិយោគខ្ពស់ ហើយការប្រមូលដើមទុននឹងត្រូវចំណាយពេលយូរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Outakeo Keodouangsinh អគ្គនាយកនៃនាយកដ្ឋានជំរុញការវិនិយោគក្រោមក្រសួងផែនការ និងវិនិយោគ បាននិយាយថា គម្រោងផ្លូវដែក ឡាវ-ចិន មានតម្លៃសរុបជាង ៥.៩ ពាន់លានដុល្លារ ហើយដំណើរការក្រោមរយៈពេលសម្បទាន ៥០ ឆ្នាំ ។

លោក Outakeo Keodouangsinh អគ្គនាយកក្រុមហ៊ុន Outakeo Keodouangsinh បានឲ្យដឹងថា ៤០ ភាគរយនៃការវិនិយោគខ្លះជាហិរញ្ញវត្ថុដោយខ្លួនឯង និង ៦០ ភាគរយជាកម្ចីពីធនាគារ Export-Import Bank របស់ប្រទេសចិន ។

លោកថា ក្រុមហ៊ុនផ្លូវដែក ឡាវ-ចិន នឹងទទួលខុសត្រូវលើថ្លៃថែទាំ និងហានិភ័យផ្សេងៗទៀត នៅពេលដែលរយៈពេលសម្បទាន ៥០ ឆ្នាំផុតកំណត់ ហើយគម្រោងនេះត្រូវបានប្រគល់ឲ្យរដ្ឋាភិបាលឡាវ ខណៈក្រុមហ៊ុនក៏អាចស្នើសុំការបន្តសម្បទានរបស់ខ្លួនពីរដ្ឋាភិបាលផងដែរ ។

លោក Outakeo Keodouangsinh បញ្ជាក់ថា “ការអភិវឌ្ឍន៍ហេដ្ឋារចនាសម្ព័ន្ធជុំវិញស្ថានីយ៍ត្រូវបានព្រមព្រៀងគ្នាលើ ៤ ចំណុច រួមមានផ្ទៃដី ១,០០០ ហិកតាក្នុងខេត្ត Oudomxay និងស្ថានីយរាជធានីវៀងច័ន្ទ និងផ្ទៃដីទំហំ ៥០០ ហិកតានៅជុំវិញស្ថានីយ Vang Vieng និង Luang Prabang ។

លោកបានកត់សម្គាល់ដែរថា រដ្ឋាភិបាលឡាវនឹងមិនផ្តល់ដីបន្ថែមទៀតសម្រាប់ការវិនិយោគជុំវិញគម្រោងផ្លូវដែកឡាវ-ចិននោះទេ ។ លោកបានបន្ថែមថា “ក្រុមហ៊ុនផ្លូវដែកឡាវ-ចិន ទទួលខុសត្រូវចំពោះដីដែលបានផ្តល់ឲ្យរួមទាំងការសាងសង់អគារ និងការជួល ព្រមទាំងផ្ដល់សំណង ឬការតាំងទីលំនៅថ្មី ស្របតាមច្បាប់នៃប្រទេសឡាវ ដែលមិនរាប់បញ្ចូលក្នុងការចំណាយលើគម្រោងផ្លូវដែកនេះ” ៕

ប្រែសម្រួលដោយ ៖ ជីវ័ន្ត

ប្រភព ៖ Laotian Times

ចុចអាន ៖ មកដឹងតម្លៃសំបុត្រជិះរថភ្លើងរត់លើផ្លូវដែក ចិន-ឡាវ