ទូតឥណ្ឌូនេស៊ី សន្យានឹងជំរុញអ្នកវិនិយោគិនមកបណ្តាក់ទុន នៅកម្ពុជាបន្ថែមទៀត

លោក ស៊ូឌារម៉ាន់ ហាសេង (Sudirman Haseng) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋឥណ្ឌូនេស៊ីប្រចាំនៅកម្ពុជា បានសន្យាថា នឹងជួយជំរុញអ្នកវិនិយោគិនមកបណ្តាក់ទុននៅកម្ពុជាបន្ថែមទៀត។

លោក ស៊ូឌារម៉ាន់ ហាសេង បានថ្លែងបែបនេះ នៅក្នុងកិច្ចសន្ទនាវិនិយោគកម្ពុជា-ឥណ្ឌូនេស៊ី នៅទីស្តីការក្រុមប្រឹក្សាអភិវឌ្ឍន៍កម្ពុជា នៅថ្ងៃទី២២ ខែកុម្ភៈ ឆ្នាំ២០២២។

លោកឯកអគ្គរដ្ឋទូតឥណ្ឌូនេស៊ី ​បានសម្ដែងអំណរសាទរចំពោះសមិទ្ធផលថ្មីៗមួយចំនួនដែល រាជដ្ឋាភិបាលកម្ពុជាសម្រេចបានដូចជា ការចាក់វ៉ាក់សាំងជូនប្រជាពលរដ្ឋដោយឥតគិតថ្លៃក្នុងអត្រាមួយខ្ពស់គួរឱ្យកត់សម្គាល់ ដែលបានធ្វើឱ្យស្ថានភាពឆ្លងរីករាលដាលនៃជំងឺកូវីដរី-១៩ អាចគ្រប់គ្រងបាន និងការធ្វើឱ្យប្រសើរឡើងនូវបរិស្ថានវិនិយោគតាមរយៈការអនុម័តច្បាប់ ស្ដីពីវិនិយោគថ្មី ដែលត្រូវបានប្រកាសដាក់ឱ្យប្រើកាលពីថ្ងៃទី១៥ ខែតុលា ឆ្នាំ២០២១។

លោក ស៊ូឌារម៉ាន់ ហាសេង បានវាយតម្លៃខ្ពស់ចំពោះការលើកកម្ពស់ចំណងមិត្តភាពកម្ពុជា-ឥណ្ឌូនេស៊ី ស្របពេលដែលកម្ពុជាកំពុងប្រឹងប្រែងដើរតួនាទីយ៉ាងសកម្ម ក្នុងនាមជាប្រធានអាស៊ានឆ្នាំ២០២២ សំដៅធានាសុខសន្តិភាពក្នុងតំបន់ដែលជាបុរេលក្ខខណ្ឌនៃការអភិវឌ្ឍ និងទាក់ទាញវិនិយោគមកកាន់តំបន់ ជាពិសេស កម្ពុជា។

លោកឯកអត្ថរដ្ឋទូតបានលើកឡើងថា សភាពាណិជ្ជកម្មឥណ្ឌូនេស៊ីនៅកម្ពុជាដែលទើបត្រូវបានបង្កើតឡើងជាផ្លូវការកាលពីថ្ងៃទី២៣ ខែកញ្ញា ឆ្នាំ២០២១ និងស្ថានទូតឥណ្ឌូនេស៊ីប្រចាំកម្ពុជា នឹងសហការជាមួយក្រសួងស្ថាប័នពាក់ព័ន្ធរបស់កម្ពុជាក្នុងការជំរុញការវិនិយោគឥណ្ឌូនេស៊ីមកកម្ពុជាបន្ថែមទៀត។

ចំណែកលោក លូហ៊ូត ប៊ិនសារ ប៉ានជ័យតាន់ (Luhut Binsar Panjaitan) រដ្ឋមន្ត្រីសម្របសម្រួលវិនិយោគ និងកិច្ចការសមុទ្រនៃសាធារណរដ្ឋឥណ្ឌូនេស៊ី ក៏បានកត់សម្គាល់នូវភាពជឿនលឿននៃកិច្ចសហប្រតិបត្តិការវិនិយោគទ្វេភាគីរវាងឥណ្ឌូនេស៊ី និងកម្ពុជា ក្នុងរយៈពេលជាងពីរទសវត្សរ៍កន្លងមក។

លោករដ្ឋមន្ត្រីបានកោតសរសើរ ក្រុមប្រឹក្សាអភិវឌ្ឍកម្ពុជា ដែលបានរៀបចំច្បាប់ស្តីពីវិនិយោគនៃព្រះរាជាណាចក្រកម្ពុជា ក្នុងការជំរុញផ្តល់កិច្ចសម្រួល ការធានា ការការពារ និងការថែទាំវិនិយោគឱ្យបានគ្រប់ជ្រុងជ្រោយ។

លោក សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានវាយតម្លៃខ្ពស់ចំពោះវិនិយោគិនឥណ្ឌូនេស៊ីដែលបានបណ្តាក់ទុននៅកម្ពុជានាពេលកន្លងមក និងបានបង្ហាញនូវសុទិដ្ឋិនិយមលើសក្ដានុពលនៃការវិនិយោគមកពីប្រទេស ឥណ្ឌូនេស៊ីដែលមានប្រជាជនច្រើនជាងគេ និងសេដ្ឋកិច្ចធំជាងគេនៅតំបន់អាស៊ាន ស្របពេលនៃការចូលជាធរមាននៃកិច្ចព្រមព្រៀងពាណិជ្ជកម្មសេរីនានាដែលនឹងបើកទីផ្សារដល់កម្ពុជាបន្ថែមទៀតដូចជា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) កិច្ចព្រមព្រៀងពាណិជ្ជកម្មសេរី កម្ពុជាចិន និងកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ។

នាឱកាសនោះ លោករដ្ឋមន្ត្រីប្រតិភូជឿជាក់ថា តាមរយៈកិច្ចសន្ទនានេះ សហគមន៍ធុរកិច្ចឥណ្ឌូនេស៊ីបានយល់កាន់តែច្បាស់ និងស៊ីជម្រៅពីច្បាប់ ស្ដីពីវិនិយោគថ្មី ហើយនឹងជួយផ្សព្វផ្សាយដល់និយោគិនឥណ្ឌូនេស៊ី មកវិនិយោគនៅកម្ពុជាបន្ថែមទៀត។

រដ្ឋមន្ត្រីប្រតិភូ បានប្តេជ្ញាចិត្តថា ក្រុមប្រឹក្សាអភិវឌ្ឍន៍កម្ពុជា នឹងផ្តល់កិច្ចសម្រួលវិនិយោគ និងសេវាថែទាំវិនិយោគ ជូនវិនិយោគិននានា ជាពិសេសវិនិយោគិនឥណ្ឌូនេស៊ី ដែលសម្រេចចិត្តមកបណ្ដាក់ទុនវិនិយោគនៅកម្ពុជា៕

អត្ថបទ៖ សំអឿន