ស្ថានីយ​ប្រេងឥន្ធនៈ​មួយចំនួន​ នៅឧត្តរមានជ័យ​បិទទ្វារ​បណ្ដោះអាសន្ន​ស្របពេល​តម្លៃប្រេង​ហក់ឡើង

ស្ថានីយលក់ប្រេងឥន្ធនៈមួយចំនួននៅក្នុងក្រុងសំរោង ខេត្តឧត្តរមានជ័យ បានបិទទ្វារជា​បណ្ដោះ​អាសន្ន​ ស្របពេលដែលតម្លៃទីផ្សារប្រេងពិភពលោក និងក្នុងស្រុកកំពង់ហក់ឡើង។

តាមការបង្ហោះឱ្យដឹងពីម្ចាស់ស្ថានីយលក់ប្រេងឥន្ធនៈ ការបិទទ្វារបណ្តោះអាសន្នដោយសារតែ​តម្លៃប្រេងឡើងចុះមិនទៀងទាត់ ខណៈដែលពេលនេះ តម្លៃប្រេងសាំងបានឡើងដល់ ៥ ៣០០ រៀល។

ប្រភពដដែលឱ្យដឹងថា មូលហេតុដែលបណ្ដាលឲ្យម្ចាស់ស្ថានីយខ្លះម្ដងបិទម្ដងបើក និងបិទ ទាំងស្រុង នោះ គឺបណ្ដាលមកពីការនាំចូលប្រេងពីក្រៅប្រទេស និងការលក់ចេញ ជូនអតិថិជន មិនមានតុល្យភាពនឹងគ្នា។

ស្ថានីយលក់ប្រេងធំៗ មួយចំនួន ដែលមិនបានបិទគឺមកពីការនាំចូលប្រេងពីក្រៅប្រទេស មាន ក្រុមហ៊ុនមានលុយ។ ចំណែក ស្ថានីយប្រេង មួយចំនួនដែលបិទនោះគឺការនាំចូលបន្តគ្នាស្រប ពេលដែលទីផ្សារមានតម្លៃថ្លៃការលក់ចេញមិនចំណេញទើបធ្វើឲ្យផ្អាកលក់ប្រេងមួយរយៈសិន។

ក្រសួងពាណិជ្ជកម្មប្រកាសថា តម្លៃប្រេងសាំងធម្មតា និងប្រេងម៉ាស៊ូតត្រូវដាក់លក់ក្នុងតម្លៃ ៥៣០០ រៀល ចាប់ពីថ្ងៃទី ១៦ ដល់ថ្ងៃទី ៣១ ខែមីនា៕

អត្ថបទ៖ចាន់ ធី