ព័ត៌មានជាតិ

ងិន ឆាយ៖ យ៉ាងយូរ២ខែទៀត មៀនប៉ៃលិន និងត្រីប្រា នាំចេញជាផ្លូវការទៅទីផ្សារចិន ក្រោយចុះហត្ថលេខាពិធីសារបច្ចេកទេសដំណាលគ្នា

បានផុស

៣ years មុន

នៅ

ថ្ងៃសុក្រ ១៨ មីនា ២០២២

ដោយ

ផ្លែមៀនប៉ៃលិន និងត្រីប្រា នឹងទទួលបានការសម្រេចអនុញ្ញាតឱ្យនាំចេញពីកម្ពុជាទៅកាន់ទីផ្សារចិនឆាប់ៗនេះ ក្រោយចុះហត្ថលេខាលើពិធីសារបច្ចេកទេសដែលភាគីចិន និងកម្ពុជាបានឯកភាពគ្នារួចរាល់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ងិន ឆាយ អគ្គនាយក នៃអគ្គនាយកដ្ឋានកសិកម្ម បានឱ្យដឹងនៅថ្ងៃទី ១៨ ខែមីនា ឆ្នាំ ២០២២នេះថា ពិធីសារបច្ចេកទេសទៅលើផ្លែមៀនប៉ៃលិន រវាងភាគីចិន និងកម្ពុជាបានឯកភាពគ្នារួចរាល់ហើយ នៅចាំតែថ្ងៃចុះហត្ថលេខា ហើយបញ្ជូនឯកសារទៅប្រទេសចិនភ្លាម។

លោកសង្ឃឹមថា រយៈពេលយ៉ាងយូរ មួយខែ ឬ ២ ខែទៀត នឹងអាចនាំមៀនប៉ៃលិនពីកម្ពុជាទៅប្រទេសចិនបាន ប៉ុន្តែបញ្ហានេះ ក៏អាស្រ័យទៅលើភាគីចិនដែរ តើគាត់មានការប្ដេជ្ញាចិត្តជំរុញនូវការវាយតម្លៃឱ្យបានលឿននៅក្នុងកម្រិតណា។

លោក ងិន ឆាយ បានបញ្ជាក់ថា ត្រីប្រា និងមៀនប៉ៃលិន នឹងចុះហត្ថលេខាទៅលើពិធីសារបច្ចេកទេសដំណាលគ្នា ខណៈដែលការចរចារបានដល់ដំណាក់កាលស្មើរគ្នាហើយ ដូច្នេះលទ្ធភាពបច្ចេកទេសគឺភាគីទាំងពីរបានឯកភាពគ្នាហើយ នៅចាំតែការចុះហត្ថលេខាទៅលើពិធីសារបច្ចេកទេសតែប៉ុណ្ណោះ។ ក្រោយពីចុះហត្ថលេខាហើយរយៈពេល ២ ឬយ៉ាងយូរ ៣ ខែប៉ុណ្ណោះ គឺអាចនាំចេញទៅចិនបានហើយ។

សូមជម្រាបថា រាជរដ្ឋាភិបាលកម្ពុជាបានជំរុញកិច្ចការងារបច្ចេកទេសក្នុងការនាំចេញមៀនប៉ៃលិន និងត្រីប្រាពីកម្ពុជាទៅកាន់ទីផ្សារចិន ដើម្បីជំរុញកំណើននាំចេញនៅកម្ពុជា និងដោះស្រាយបញ្ហានានាជូនប្រជាពលរដ្ឋ ខណៈទីផ្សារមៀនប៉ៃលិនក៏បានជួបបញ្ហាកង្វះទីផ្សារ និងធ្លាក់តម្លៃនាពីពេលកន្លងមក៕

អត្ថបទ៖ ឡេង ដេត