ខែមេសានេះ CDC អនុម័ត​គម្រោង​វិនិយោគចំនួន ១១ មាន​ទុនជាង ៧០ លានដុល្លារ

ក្រុមប្រឹក្សាអភិវឌ្ឍន៍កម្ពុជាដែលហៅកាត់ថា (CDC) នៅ​ខែមេសាឆ្នាំ២០២២នេះ បានអនុម័ត​គម្រោង​វិនិយោគ​ចំនួន​១១​ក្រុមហ៊ុន មានទុនវិនិយោគចំនួន ៧១,៧លានដុល្លារអាមេរិក ដោយផ្តល់ឱកាសការងារជូនដល់ប្រជាពលរដ្ឋចំនួន​៨២៧៤​កន្លែង។

ចំនួននេះ​បើប្រៀបធៀបទៅនឹងខែមីនាឆ្នាំ២០២២ មានការកើនឡើង ខណៈខែមីនា CDC បានអនុម័តវិនិយោគចំនួន​ ៤​ដែល​មាន​ទុនវិនិយោគប្រមាណជាង ១៣លានដុល្លារអាមេរិក ដោយបានផ្តល់ឱកាសការងារជូនប្រជាពលរដ្ឋជិត ៣ ពាន់កន្លែងប៉ុណ្ណោះ។

ក្នុងចំណោមក្រុមចំនួន ១១ ក្នុងនោះបានបោះទុនវិនិយោគចាប់ពី ១លានដុល្លារអាមេរិកដល់ជាង ១៤ លានដុល្លារអាមេរិក ដោយវិនិយោគភាគច្រើនលើការបង្កើតរោងចក្រកាត់ដេរសំលៀកបំពាក់ រួមទាំងរោងចក្រផលិតកាបូបគ្រប់ប្រភេទ រោងចក្រផលិតគ្រឿងសង្ហារឹមគ្រប់ប្រភេទ រោងចក្រផលិតសម្ភារៈបរិក្ខារប្រើប្រាស់ខ្សែភ្លើង និងផលិតផលផ្លាស្ទិកនិង រោងចក្រផលិតនិងផ្គុំដំឡើងផលិតផលអគ្គិសនី និងបរិក្ខារអេឡិចត្រូនិករោងចក្រផលិតសម្ភារៈវេចខ្ចប់ កេសកាតុង ស្លាកសញ្ញា ប្រអប់ឈើ ឈើទម្រសម្រាប់តម្កល់សម្ភារៈបរិក្ខារ ថង់ប្លាស្ទិក និងបោះពុម្ពលើសម្ភារៈបរិក្ខារគ្រប់ប្រភេទ៕

អត្ថបទ៖​ សំអឿន