ព័ត៌មានជាតិ

ថៃស្នើបើកច្រកស្ទឹងបត់ ដើម្បីកាត់បន្ថយការកកស្ទះនៅច្រកប៉ោយប៉ែត

បានផុស

៤ years មុន

នៅ

ថ្ងៃព្រហស្បតិ៍ ១៧ ធ្នូ ២០២០

ដោយ

អាជ្ញាធរខេត្តស្រះកែវប្រទេសថៃ បានសំណើសុំ បើកកិច្ចប្រជុំពិភាក្សាជាមួយប្រទេសកម្ពុជាលើខ្លឹមសារ៣ចំណុចសំខាន់ៗដែលឲ្យពលករកម្ពុជាចូលធ្វើការប្រមូលផលិតផលកសិកម្ម និងឲ្យអាជីវករកម្ពុជាចូលមកក្នុងព្រះរាជាណាចក្រថៃ ដើម្បីប្រកបអាជីវកម្ម នៅក្នុងតំបន់ផ្សាររុងក្លឿ។ មិនតែប៉ុណ្ណោះបើកប្រើប្រាស់ស្ពានមិត្តភាព ណងអៀន ស្ទឹងបត់ស្រុកអារញ្ញជាច្រកដឹកទំនិញ ដើម្បីកាត់បន្ថយការកកស្ទះនៅច្រកព្រំដែន ខ្លងលឹក ស្រុកអារញ្ញ័។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សំណើស្នើសុំនេះធ្វើឡើងតាមឯកសារផ្លូវការរបស់សាលាខេត្តស្រះកែវ កាលពីថ្ងៃទី១៤ ខែធ្នូ ឆ្នាំ ២០២០ ហើយការស្នើនេះភាគីទាំងពីរដែលរួមមាន អាជ្ញាធរខេត្តស្រះកែវប្រទេសថៃ និងភាគីកម្ពុជាដែលមានអាជ្ញាធរខេត្តបាត់ដំបងនិងខេត្តបន្ទាយមានជ័យ បានជួបប្រជុំគ្នានៅលើស្ពានមិត្តភាពកម្ពុជាថៃនៃច្រកអន្តរជាតិភ្នំដី ស្ថិតក្នុងស្រុកសំពៅលូន ខេត្តបាត់ដំបងកាលពីព្រឹកថ្ងៃទី១៧ ខែធ្នូឆ្នាំ ២០២០។

ភាគីខេត្តស្រះកែវប្រទេសថៃដឹកនាំ ដោយអភិបាលខេត្តស្រះកែវ និងមានការចូលរួមពីមេបញ្ជាការកងកម្លាំងបូពា៍,នាយករងសន្តិសុខផ្ទៃក្នុងខេត្តស្រះកែវតំណាងក្រសួងមហាផ្ទៃនៃប្រទេសថៃ និងអ្នកជាប់ពាក់ព័ន្ធជាច្រើនទៀតរបស់មន្ទីរស្ថាប័ននៅខេត្តស្រះកែវ។ កម្ពុជារួមមានខេត្តបាត់ដំបង និងខេត្តបន្ទាយមានជ័យ ខេត្តបាត់ដំបងដឹកនាំដោយឯកឧត្តម ងួនរ តនៈ អភិបាលនៃគណៈអភិបាលខេត្តបាត់ដំបង និងកងកម្លាំងប្រដាប់អាវុធទាំងបីប្រភេទមន្ទីរពាក់ព័ន្ធនានាចំពោះខេត្តបន្ទាយមានជ័យ ដឹកនាំដោយឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ និងអង្គភាពពាក់ព័ន្ធរបស់ខេត្តបន្ទាយមានជ័យផងដែរ។

អ្វីដែលស្នើសុំ របស់ភាគីថៃក្នុងកិច្ចប្រជុំនេះគឺ មានការលេចធ្លោនូវការបើកឲ្យដំណើរការនៃច្រក អន្តរជាតិស្ទឹងបត់ ដែលច្រកនេះ បានស្ថាបនាហើយនិងបានភ្ជាប់រវាងប្រមុខរដ្ឋាភិបាលទាំងពីរប្រទេសកាលពីកន្លងទៅ។

ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ តាមរយៈសំណើខាងលើរបស់ភាគីថៃអាជ្ញាធរខេត្តបន្ទាយមានជ័យបានត្រៀមរួចជាស្រេច ដោយកាលពីថ្ងៃទី១៦មុននៃការប្រជុំ ឯកឧត្តមជាមួយក្រុមការងារគណៈកម្មការប្រយុទ្ធជំងឺកូវីដ១៩ ថ្នាក់ខេត្តបានចុះត្រួតពិនិត្យច្រកព្រំដែនអន្តរជាតិប៉ោយប៉ែតនិងស្ទឹងបត់ដើម្បីត្រៀមរៀបចំការងារត្រួតពិនិត្យធ្វើដំណើររបស់អ្នកធ្វើដំណើរទៅនាពេលខាងមុខ នឹងផ្ដល់ការណែនាំសម្រាប់ការត្រួតពិនិត្យសុខភាពរបស់មន្ត្រីចត្តាឡីស័កឲ្យបានល្អប្រសើរ។

ឯកឧត្តម អ៊ុ រាត្រី បានអោយដឹងទៀតថា កិច្ចប្រជុំពិភាក្សាការងារ ពិគ្រោះយោបល់ការបន្ធូរបន្ថយច្បាប់ស្តីពីការគ្រប់គ្រងស្ថានការណ៍ក្នុងគ្រាអាសន្ន ដើម្បីដោះស្រាយដំណើរការសេដ្ឋកិច្ចក្នុងតំបន់ដែលមានរបៀបវរៈដូចខាងក្រោម:

១.ឲ្យពលករកម្ពុជាចូលទៅធ្វើការក្នុងវិស័យកសិកម្ម ក្នុងព្រះរាជាណាចក្រថៃ

២.ឲ្យអាជីវករកម្ពុជាចូលទៅប្រកបអាជីវកម្ម ក្នុងផ្សាររោងក្លឿ ស្រុកអារញ្ញប្រាថេត ខេត្តស្រះកែវ

៣.បើកប្រើប្រាស់ច្រកទ្វារព្រំដែនអន្តរជាតិស្ទឹងបត់ បានណងអៀន បណ្តោះអាសន្ន ជាច្រកដឹកទំនិញ ដើម្បីកាត់បន្ថយការកក់ស្ទះ នៅច្រកទ្វារព្រំដែនអន្តរជាតិប៉ោយប៉ែត ខ្លងឡឹក។

សូមបញ្ជាក់ជូនថា ចំពោះលទ្ធផលនៃកិច្ចប្រជុំមិនទាន់មានការឯកភាពទាំងស្រុងនោះទេ ស្ថិតក្នុងការពិភាក្សា រងចាំមានការឯកភាពជាគោលការណ៍បន្ថែមតាមក្រោយទៀត៕

អត្ថបទ ៖ អពៅ