​ក្រុមប្រឹក្សា​អភិវឌ្ឍកម្ពុជា​បើកភ្លើងខៀវ​ឱ្យ​បើក​រោងចក្រ​៤ បន្ថែមទៀត ​ប្រើទុន​វិនិយោគ​ជិត ១៤ លានដុល្លារ​

ក្រុមប្រឹក្សា​អភិវឌ្ឍ​កម្ពុជា ​នៅថ្ងៃទី ១១ ខែឧសភានេះ បាន​សម្រេចចេញវិញ្ញាបនបត្រ​ចុះបញ្ជីគម្រោង​វិនិយោគ​ចំនួន ៤ បន្ថែមទៀត ដែលមានទុនវិនិយោគ​សរុប​ប្រមាណ​ជិត ១៤ លានដុល្លារ និងបង្កើតការងារ​បានជិត ៣ ពាន់កន្លែង។

គម្រោងបង្កើតរោងចក្រទាំងនោះ រួមមាន៖

១. គម្រោងបង្កើតរោងចក្រ GLORY LIGHT (CAMBODIA) INTERNATIONAL CO., LTD. ជារោងចក្រផលិតសម្ភារប្រើប្រាស់ក្នុងផ្ទះ និងការិយាល័យ (ពីក្រណាត់ និងក្រដាស) ដែលមានទីតាំងវិនិយោគស្ថិតនៅភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ មានទុនវិនិយោគប្រមាណ ៣,២លានដុល្លារអាមេរិក និងអាចបង្កើតការងារបានចំនួន ៥១៤កន្លែង។

២. គម្រោងបង្កើតរោងចក្រកាត់ដេរសម្លៀកបំពាក់ឈ្មោះ J TEX GARMENT CO., LTD. ដែលមាន​ទីតាំង​វិនិយោគ​ស្ថិតនៅអគារលេខ២ និងលេខ៤ ដីឡូតិ៍លេខ១ ផ្លូវជាតិលេខ៤ ភូមិវល្លិសរ ស្រុក​សំរោង​ទង ខេត្តកំពង់ស្ពឺ មានទុនវិនិយោគប្រមាណ ៣,៩លានដុល្លារអាមេរិក និងអាចបង្កើតការងារ​បាន​ចំនួន ៨២៤កន្លែង។

៣. SELLY FASHION GARMENT FACTORY CO., LTD. គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅក្នុងសួនឧស្សាហកម្ម ស៊ូចូវ ខេមបូឌា ផ្លូវជាតិលេខ២១ ភូមិព្រែកឡុង សង្កាត់រកាខ្ពស់ ក្រុងតាខ្មៅ ខេត្តកណ្តាល មានទុនវិនិយោគប្រមាណ ៣,៥លានដុល្លារអាមេរិក និងអាចបង្កើតការងារបានចំនួន ៤៦៤កន្លែង។

៤. SZ GOLDEN WAY TEXTILE (CAMBODIA) CO., LTD. គម្រោងបង្កើតរោងចក្រកាត់ដេរ​សម្លៀកបំពាក់ ដែលមានទីតាំងវិនិយោគស្ថិតនៅភូមិតាកែវ ឃុំស្រែរនោង ស្រុកត្រាំកក់ ខេត្តតាកែវ មានទុនវិនិយោគប្រមាណ ៣,៣លានដុល្លារអាមេរិក និងអាចបង្កើតការងារបានចំនួន ១.០៧២កន្លែង៕