វៀតណាម-ថៃ ពិភាក្សាគ្នា ​លើកិច្ច​ព្រមព្រៀង​ដំឡើង​ថ្លៃស្រូវ​អង្ករ

ប្រទេសថៃ និងវៀតណាម កំពុងពិភាក្សាគ្នាលើកិច្ចព្រមព្រៀងមួយ ដើម្បីបង្កើនតម្លៃនៃការនាំចេញស្រូវអង្កររបស់ពួកគេ ជាមួយគោលបំណងបង្កើនអានុភាពស្រូវអង្ករ នៅក្នុងទីផ្សារពិភពលោក និងលើកកម្ពស់ប្រាក់ចំណូលរបស់កសិករ។

មន្ត្រីកសិកម្មមកពីប្រទេសថៃ និងវៀតណាម ដែលជាអ្នកនាំចេញស្រូវអង្ករធំជាងគេលំដាប់ទីពីរ និងទីបីរបស់ពិភពលោក បានជួបប្រជុំគ្នានៅទីក្រុងបាងកក កាលពីថ្ងៃសុក្រទី២៧ខែឧសភា ដើម្បីពិភាក្សាអំពីវិធានការរួមគ្នា ជួយដល់កសិករ និងឧស្សាហកម្មស្រូវអង្កររបស់ពួកគេ និងគ្រប់គ្រងថ្លៃដើមផលិតកម្ម។

អ្នកនាំពាក្យរដ្ឋាភិបាលថៃ លោក Thanakorn Wangboonkongchana បាននិយាយនៅក្នុងសេចក្តីថ្លែងការណ៍មួយថា “យើងមានបំណងបង្កើនតម្លៃស្រូវអង្ករ បង្កើនប្រាក់ចំណូលរបស់កសិករ និងបង្កើនអំណាចតថ្លៃនៅក្នុងទីផ្សារពិភពលោក។ តម្លៃស្រូវ​អង្ករ​បាន​ធ្លាក់​ចុះ​ជាង​២០​ឆ្នាំ​មក​ហើយ ខណៈ​ដែល​តម្លៃ​នៃ​ការ​ផលិត ​មាន​ការ​កើន​ឡើង”។

ភ្លាមៗនេះ ក្រសួង​កសិកម្ម​វៀត​ណាម​មិន​អាច​ទាក់​ទង​សុំ​ការ​អធិប្បាយ​បាន​ទេ។

យោងតាមក្រសួងកសិកម្មសហរដ្ឋអាមេរិកបានឲ្យដឹងថា វៀតណាម និងថៃ បានរួមចំណែកប្រហែល ១០% នៃផលិតកម្មស្រូវអង្ករពិភពលោក និងប្រហែល ២៦% នៃការនាំចេញសកល។

ទោះបីជាយ៉ាងណាក៏ដោយ ការដំឡើងតម្លៃ នឹងក្លាយជាដំណឹងអាក្រក់សម្រាប់អ្នកទិញ និងអ្នកប្រើប្រាស់ចំពេល តម្លៃអាហារពិភពលោកកំពុងឡើងថ្លៃ៕

ប្រែសម្រួល៖ Vann Vann

ប្រភព៖ Tuoi Tre

ចុចអាន៖ ១០ខែឆ្នាំ ២០២១ កម្ពុជារកចំណូលបាន​ពីការនាំ​ចេញស្រូវអង្ករចំនួនជិត​១០លានដុល្លារ