ដឹងទេក្នុងមួយថ្ងៃៗ រុស្ស៊ី កើបលុយពីចំណូលប្រេងបានប៉ុន្មានលាន? (មានវីដេអូ)

បើទោះជាប្រទេសរុស្ស៊ីកំពុងរងការវាយប្រហារដោយការដាក់ទណ្ឌកម្មកាន់តែខ្លាំងឡើង ចាប់តាំងពីសង្គ្រាមលុកលុយលើអ៊ុយក្រែនក៏ដោយ ប៉ុន្តែទីក្រុងមូស្គូនៅតែអាចកើបលុយបានចំនួន ៨០០ លានដុល្លារក្នុងមួយថ្ងៃពីចំណូលប្រេង និងឧស្ម័ននៅឆ្នាំនេះ ដោយសារតែតម្លៃថាមពលលើពិភពលោកកើនឡើង ។

បើយោងតាមព្យាករណ៍របស់សារព័ត៌មាន Bloomberg Economics កាលពីសប្តាហ៍មុនបានឲ្យដឹងថា ការកើនឡើងនៃចំណូលតម្លៃប្រេង និងឧស្ម័នរបស់រុស្ស៊ីអាចដល់ ២៨៥ ពាន់លានដុល្លារនៅឆ្នាំនេះ ពោលខ្ពស់ជាង ២០ ភាគរយពីការលក់ប្រេង និងឧស្ម័នកាលពីឆ្នាំ ២០២១ ដែលមានតម្លៃ ២៣៥.៦ ពាន់លានដុល្លារ ។

តម្លៃប្រេងក្នុងប្រទេសដែលគ្រប់គ្រងដោយលោកប្រធានាធិបតី វ្ល៉ាឌីមៀ ពូទីន បានកើនឡើងប្រហែល ៥០ ភាគរយនៅឆ្នាំនេះ ហើយកំពុងជួញដូរក្នុងកម្រិតខ្ពស់បំផុតក្នុងរយៈពេល ១៣ ឆ្នាំចុងក្រោយ ដោយសារការផ្គត់ផ្គង់តឹងតែងបង្កឡើងពីសង្រ្គាម និងតម្រូវការងើបឡើងវិញយ៉ាងខ្លាំង នៅពេលដែលជំងឺរាតត្បាតកាន់តែធូរស្រាល ។

ដោយឡែកកាលពីថ្ងៃទី ៣០ ខែឧសភា សហភាពអឺរ៉ុបបានយល់ព្រមកាត់បន្ថយការនាំចូលប្រេងពីរុស្ស៊ីចំនួន ៩០ ភាគរយទៅកាន់ប្លុកនេះត្រឹមដំណាច់ឆ្នាំ ២០២២ ប៉ុន្តែប្រទេសមួយចំនួនក្នុងប្លុកនេះ រួមទាំងអាល្លឺម៉ង់ ដែលជាមហាអំណាចសេដ្ឋកិច្ចរបស់អឺរ៉ុប នៅតែបន្តពឹងផ្អែកខ្លាំងលើប្រេង និងឧស្ម័នរុស្ស៊ី ។

ទន្ទឹមនោះប្រទេស​ដូចជា​ចិន និង​ឥណ្ឌា​ក៏​កំពុង​ទិញ​ប្រេង​ពី​រុស្ស៊ី​ផង​ដែរដែល​ធ្វើ​ឲ្យ​វាកាន់តែប៉ះពាល់​ដល់​ទណ្ឌកម្ម​អន្តរជាតិ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Business Insider

ចុចអាន ៖ មន្ត្រី UN ថា សង្រ្គាម រុស្ស៊ី-អ៊ុយក្រែន នឹងគ្មានអ្នកឈ្នះឡើយ