កសិករ​ពីរ​គ្រួសារ​ ដាំដុះបន្លែ​​​មាន​បច្ចេកទេស​ទទួលទិន្នផល​ខ្ពស់ ​មិនប្រើ​សារធាតុ​គីមី​

ប្រជាកសិករនៅស្រុកថ្មគោលរីករាយការប្រមូលផលកសិកម្ម ដែលបានហុចផលហើយមានទីផ្សារល្អ ដោយសារ​បាន​ការបណ្តុះបណ្តាល និង​ជួយជ្រោមជ្រែង​ពីមន្ត្រីជំនាញនៃមន្ទីរកសិកម្មខេត្ត​បាត់ដំបង។

កសិករឈ្មោះ ធឿន សាម៉ូន រស់នៅភូមិក្បាលថ្នល់ ឃុំព្រៃខ្ពស់ ស្រុកបវេល ខេត្តបាត់ដំបង បានលើកឡើងថា មុខរបរកសិកម្មរបស់លោក បានសម្រេចជាបន្តបន្ទាប់ដោយសារតែមានមន្ត្រីនៃមន្ទីរកសិកម្មខេត្តបាន​បណ្តុះបណ្តាល​បច្ចេកទេស​លើការដាំដុះ​​ដំណាំបន្លែមាន​អនាម័យ មិនប្រើ​សារធាតុ​គីមី ទទួល​បាន​ផលល្អដែលផ្តល់​ចំណូល​កាត់បន្ថយការខ្វះខាតជីវភាពក្នុងគ្រួសារ។

បច្ចុប្បន្នលោកបានប្រកបមុខរបរកសិកម្ម ដាំបន្លែ ស្ពៃក្រញ់ លើផ្ទៃដី ២៤០ម៉ែត្រ ហើយបានប្រមូលផលចំនួន ២ លើកដោយលើកទី១ បាន៤០០គក្រ និងលើកទី២ បានចំនួន៤០០គក្រ ខណ:លក់បានតម្លៃ ២៥០០/គក្រ។

លោក ផល សុភ័ក្រ ជាកសិករមួយ​រូប​ទៀត រស់នៅភូមិគ្រួស ឃុំអន្លង់រុន ស្រុកថ្មគោល បានឲ្យដឹងដែរថា លោកបានដាំត្រសក់លើផ្ទៃដី១៦០០ ម៉ែត្រការ៉េ ហើយបានប្រមូលផលបានរហូតដល់ ៥ ដងក្នុងមួយរដូវកាល ដោយ​ប្រមូល​ផលម្តងៗបានចាប់ពី ២៦០-៣០០គីឡូក្រាម ខណ:ទីផ្សារលក់បាន ២២០០រៀលក្នុងមួយគីឡូក្រាម។ លទ្ធផលទាំងនេះបានធ្វើឲ្យគ្រួសាររបស់លោក មានកម្រិតជីវភាពគ្រួសារបានល្អប្រសើរ ជាមួយការបណ្តុះបណ្តាលកូនឲ្យមានការចេះដឹងដោយមិនមានការប្រឈមណាមួយ ពាក់ព័ន្ធជីវភាពគ្រួសារឡើយតាមរយ:មន្ត្រីនៃមន្ទីរជំនាញរបស់រាជរដ្ឋាភិបាលបានលើកកម្ពស់លើមុខរបរខាងលើនេះប្រកបដោយប្រសិទ្ទិភាពផង។

ថ្មីៗនេះដែរ មន្ត្រីការិយាល័យកសិកម្ម ធនធានធម្មជាតិ និងបរិស្ថាន និងភ្នាក់ងារផ្សាយឃុំ ក្នុងស្រុកបវេល ក៏បានចុះពិនិត្យ បណ្តុំបន្លែរបស់​កសិករទាំង២គ្រួសារខាងលើ ខណ:ផលបន្លែរបស់ពួកគាត់កំពុងប្រមូលផលចូលទីផ្សារជាបន្តបន្ទាប់ន។

រាល់ទិន្នផលដែលកសិករទាំង២គ្រួសារទទួលបាន មានអនាម័យល្អស្របជាមួយគុណភាពខ្ពស់ ដែល​តម្រូវការតាមទីផ្សារ និង​បានលើកកម្ពស់ដល់សុខភាពអ្នកដែលយកទៅបរិភោគផង និង​បានលើកកម្ពស់ជីវភាពគ្រួសារជាកសិករ ក្នុងគ្រាបច្ចុប្បន្នក៏ដូចជានៅថ្ងៃខាងមុខ៕

អត្ថបទ៖ សៅ សារិទ្ធ