អតិផរណារបស់សហរដ្ឋអាមេរិក កើនឡើងដល់កម្រិតខ្ពស់បំផុតក្នុងរយៈពេល ៤០ឆ្នាំ

ក្រសួងការងារសហរដ្ឋអាមេរិកបាននិយាយថា តម្លៃឧស្ម័ន អាហារ ព្រមទាំងទំនិញ និងសេវាកម្មផ្សេងទៀតភាគច្រើននៅក្នុងសហរដ្ឋអាមេរិក បានកើនឡើងខ្លាំងក្នុងខែឧសភា ដោយបានជំរុញអតិផរណាហក់ដល់កម្រិតខ្ពស់បំផុត មិនធ្លាប់មានសោះរយៈពេល៤ទសវត្សរ៍។

តម្លៃទំនិញប្រើប្រាស់ បានកើនឡើង ៨,៦%កាលពីខែឧសភា បើធៀបនឹង១២ខែមុននោះ។

បើធៀបពីមួយខែទៅមួយខែ, តម្លៃទំនិញនានាបានកើនឡើង ១%ពីខែមេសាដល់ខែឧសភា ពោលគឺកើនឡើងខ្លាំងជាងពីខែមីនាដល់ខែមេសា ដែលកើនឡើងត្រឹម ០,៣%ប៉ុណ្ណោះ។

របាយការណ៍នេះបានគូសបញ្ជាក់ពីការភ័យខ្លាចថា អតិផរណា កំពុងរីករាលដាលកាន់តែខ្លាំងៗ ខណៈតម្លៃថាមពល និងទំនិញ កំពុងត្រូវបានជំរុញដោយការកកស្ទះខ្សែសង្វាក់ផ្គត់ផ្គង់ និងការលុកលុយរបស់រុស្ស៊ីលើអ៊ុយក្រែន។ បញ្ហានេះក៏បានធ្វើឲ្យតម្លៃភាគហ៊ុនធ្លាក់ចុះផងដែរ។

លោក Ethan Harris ប្រធានផ្នែកស្រាវជ្រាវសេដ្ឋកិច្ចសកល នៅធនាគារ Bank of America បាននិយាយថា “ជាទូទៅ វិស័យទាំងអស់ មានអតិផរណាខ្ពស់ជាងធម្មតា។ វា​បាន​ធ្វើ​ដំណើរ​ចូល​ទៅ​គ្រប់​ច្រក​ល្ហក​នៃ​សេដ្ឋកិច្ច។ នោះ​ជា​រឿងគួរឲ្យព្រួយបារម្ភ ​ព្រោះ​វា​មាន​ន័យ​ថា អតិផរណា ​ទំនង​ជា​នៅ​តែ​បន្តកើនឡើង”៕

ប្រែសម្រួល៖ Vann Vann

ប្រភព៖ Politico, Al Jazeera

ចុចអាន៖ តម្លៃ ហ្គាសនៅ អាមេរិក ឡើង ដល់ កម្រិតបំបែកកំណត់ត្រា ថ្មី