អាមេរិក ពិចារណាដកពន្ធទំនិញមួយចំនួនរបស់ ចិន ដើម្បីបន្ថយអតិផរណា (មានវីដេអូ)

ប្រធានាធិបតីសហរដ្ឋអាមេរិកលោក ចូ បៃដិន កំពុងពិចារណាដកពន្ធមួយចំនួនដែលអតីតប្រធានាធិបតី ដូណាល់ ត្រាំ ដាក់លើទំនិញចិន ដើម្បីកាត់បន្ថយការកើនឡើងអតិផរណាខ្ពស់បំផុតមិនធ្លាប់ក្នុងរយៈពេល ៤០ ឆ្នាំកន្លងមកនេះ ។

ការពិចារណាដកពន្ធមួយចំនួនដើម្បីបន្ថូរបន្ថយអតិផរណាកើតឡើង នៅពេលដែលតម្លៃទំនិញប្រើប្រាស់បានកើនឡើង ៨.៦ ភាគរយនៅក្នុងខែឧសភា បើធៀបនឹង ១២ ខែមុន ហើយបើធៀបពីមួយខែទៅមួយខែ តម្លៃទំនិញនានាបានកើនឡើង ១ ភាគរយពីខែមេសាដល់ខែឧសភា ពោលគឺកើនឡើងខ្លាំងជាងពីខែមីនាដល់ខែមេសា ដែលកើនឡើងត្រឹម ០.៣ ភាគរយប៉ុណ្ណោះ ។

ទន្ទឹមនោះក្រុមអ្នកជំនួញ និងអ្នកសេដ្ឋកិច្ចមួយចំនួនបាននិងកំពុងដាក់សម្ពាធដល់រដ្ឋបាលលោក បៃដិន ឲ្យបន្ធូរបន្ថយពន្ធលើការនាំចូលទំនិញមួយចំនួនពីប្រទេសចិន ដោយចាត់ទុកថា វានឹងជាជំហានដ៏សំខាន់ដែលប្រធានាធិបតីអាចអនុវត្តបានដើម្បីកាត់បន្ថយការចំណាយច្រើនទៅៗសម្រាប់អ្នកប្រើប្រាស់ក្នុងស្រុក ។

បច្ចុប្បន្នអតិផរណានៅសហរដ្ឋអាមេរិកបានធ្វើឲ្យខូចទំនុកចិត្តអ្នកប្រើប្រាស់ និងជំរុញឲ្យទីផ្សារភាគហ៊ុនក្នុងស្រុកធ្លាក់ចុះ ២០ ភាគរយពីកម្រិតខ្ពស់បំផុតក្នុងខែមករា ហើយក៏កំពុងមានការភ័យខ្លាចអំពីការធ្លាក់ចុះសេដ្ឋកិច្ច នៅពេលដែលធនាគារកណ្តាលអាមេរិកធ្វើសកម្មភាពដើម្បីបង្កើនអត្រាការប្រាក់ ។

ប៉ុន្តែទោះជាយ៉ាងណា សេដ្ឋវិទូអាមេរិកមួយចំនួនបានលើកឡើងថា ការកាត់បន្ថយពន្ធគយដែលលោក បៃដិន កំពុងពិចារណាដើម្បីបន្ថូរបន្ថយអត្រាអតិផរណាទាំងមូលនោះគឺអាចធ្វើទៅបានត្រឹមមួយភាគបួនភាគរយប៉ុណ្ណោះ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ The New York Times

ចុចអាន ៖ លោក Joe Biden ធ្លាក់ពីលើកង់ ពេលជួបហ្វូងអ្នកគាំទ្រ (មានវីដេអូ)