តម្លៃប្រេងពិភពលោក បង្ហាញសញ្ញាល្អ មុនកិច្ចប្រជុំ OPEC

តម្លៃប្រេងពិភពលោកបានធ្លាក់ចុះបន្តិចវិញកាលពីថ្ងៃព្រហស្បតិ៍ មុនកិច្ចប្រជុំរបស់អង្គការនៃប្រទេសនាំចេញប្រេង (OPEC) បន្ទាប់ពីអង្គការមួយនេះរំពឹងថានឹងផ្គត់ផ្គង់ប្រេងដល់ពិភពលោកសម្រាប់ខែសីហាខាងមុខ ។

ប្រេងឆៅអន្តរជាតិម៉ាក Brent កំពុងជួញដូរនៅតម្លៃ ១១២.២៣ ដុល្លារក្នុងមួយបារ៉ែល ពោលថយចុះ ០.២០ ភាគរយ បន្ទាប់ពីប៉ុន្មានថ្ងៃមុនដាក់លក់ក្នុងតម្លៃ ១១២.៤៥ ដុល្លារក្នុងមួយបារ៉ែល ។

ចំណែកតម្លៃប្រេងរបស់ក្រុមហ៊ុនអាមេរិក West Texas Intermediate (WTI) ក្នុងរយៈពេលដូចគ្នានេះក៏ធ្លាក់ថ្លៃផងដែរ ពោលលក់ក្នុងតម្លៃ ១០៩.៤៤ ដុល្លារក្នុងមួយបារ៉ែល ធ្លាក់ចុះ ០.៣១ ភាគរយ ក្រោយលក់ក្នុងតម្លៃ ១០៩.៧៨ ដុល្លារក្នុងមួយបារ៉ែល ។

បើយោងតាមរដ្ឋបាលព័ត៌មានថាមពលអាមេរិក (EIA) បានឲ្យដឹងថា ស្តុកប្រេងឆៅពាណិជ្ជកម្មរបស់សហរដ្ឋអាមេរិកបានថយចុះចំនួន ២.៨ លានបារ៉ែល មកនៅត្រឹម ៤១៥.៦ លានបារ៉ែលកាលពីសប្តាហ៍មុន ហើយបើធៀបនឹងទីផ្សារលក់គឺធ្លាក់ចុះ ១១០,០០០ បារ៉ែល ។

គួរបញ្ជាក់ថា ផលលំបាកនៃការផ្គត់ផ្គង់ដែលបណ្តាលមកពីការដាក់ទណ្ឌកម្មនៅក្នុងប្រទេសរុស្ស៊ី ខ្យល់ព្យុះនៅសហរដ្ឋអាមេរិក ក៏ដូចជាភាពចលាចលនយោបាយនៅក្នុងប្រទេសអេក្វាឌ័រ និងលីប៊ី ត្រូវបានគេមើលឃើញថាជាកត្តាចម្បងចំពោះការកាត់បន្ថយការធ្លាក់ចុះនៃតម្លៃប្រេង ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អ៊ុយក្រែន បញ្ចេញទិន្នន័យថ្មីចំនួនទាហានស្លាប់ក្នុងសង្គ្រាមរាល់ថ្ងៃ