សម្តេច ហ៊ុន សែន៖​ អ្នកមានលុយគួរទិញឡាន​អាគុយជិះ សន្សំសំចៃកាត់បន្ថយចំណាយ​ប្រេងសាំង

សម្តេចតេជោ ហ៊ុន សែន នាយករដ្ឋមន្រ្តី បានណែនាំពលរដ្ឋឱ្យងាកទៅជិះរថយន្តប្រើអាគុយវិញ ដើម្បីសន្សំសំចៃ កាត់បន្ថយការចំណាយលើសាំង ស្របពេលដែលប្រេងកំពុងមានតម្លៃខ្ពស់ និងបង្ការខ្វះប្រេងប្រើប្រាស់នៅថ្ងៃខាងមុខ ដោយសារវិបត្តិពិភពលោក។ សម្តេចពន្យល់ដូច្នេះថា« ខ្ញុំមើលឃើញផលប្រយោជន៍ពីរយ៉ាង ទី១ កាត់បន្ថយការចំណាយ​ទៅលើបញ្ហាសាំង ទី២ កាត់បន្ថយគ្រោះថា្នក់ចរាចរណ៍ ដោយសារវាបើកអត់បានលឿនពេក»។

 លើសពីនេះទៀត សម្តេចតេជោ បានផ្តល់យោបល់ដល់អ្នកដែលមានលុយ គួរទិញឡាន Prius ជិះវិញ ព្រោះរថយន្តប្រភេទនេះ ស៊ីទាំងអាគុយ និងសាំង ដូច្នេះវាជួយសន្សំសំចៃប្រេងបានច្រើន ជាងរថយន្តដទៃ ដែលស៊ីតែប្រេងសុទ្ធ។

សម្តេចលើកឡើងថា នៅឡាវ ស្រីលង្កាកំពុងខ្វះប្រេងប្រើប្រាស់ តែនៅកម្ពុជា មិនទាន់ខ្វះនោះទេ។ តែសម្តេចបារម្ភនៅពេលណាមួយអាចនឹងលំបាក មានលុយហើយ តែទិញប្រេងមិនបានប្រើប្រាស់។

សម្តេចតេជោ ថ្លែងបែបនេះ នៅក្នុងពិធីអបអរសាទរទិវាមច្ឆាជាតិ ០១ កក្កដា ឆ្នាំ២០២២ នៅទីតាំងអាងទឹកត្រពាំងថ្ម ភូមិ​ត្រពាំងថ្ម ឃុំ​ប៉ោយចារ ស្រុក​ភ្នំស្រុក ខេត្តបន្ទាយមានជ័យ។

សូមបញ្ជាក់ថា រយៈពេល ៥ខែ ឆ្នាំ ២០២២ កម្ពុជា នាំចូលប្រេង គិតជាតម្លៃស្មើនឹង ៩៧១លានដុល្លារ កើនឡើង ៥៧.៣៦ភាគរយ។ តម្លៃនេះ បានកើនឡើងចំនួន ៣៥៤លានដុល្លារ បើធៀបនឹងរយៈពេលដូចគ្នា កាលពីឆ្នាំ ២០២១។

តម្លៃប្រេងសាំងលក់រាយតាមស្ថានីយ៍នានា គិតចាប់ពីថ្ងៃទី ០១ ខែ កក្កដា ដល់ថ្ងៃទី ១០ ខែ កក្កដា មានតម្លៃ ៥៨០០រៀល ក្នុងមួយលីត សម្រាប់ប្រេងសាំងធម្មតា និងប្រេងម៉ាស៊ូតថ្លៃ ៦២០០រៀល ក្នុងមួយលីត្រ។ នេះបើតាមការប្រកាសរបស់ក្រសួងពាណិជ្ជកម្ម នៅថ្ងៃនេះ។ ក្រសួងពាណិជ្ជកម្ម ចេញតម្លៃលក់រាយរៀងរាល់ ១០ថ្ងៃម្តង ដើម្បីឆ្លើយតបឱ្យទាន់និន្នាការនៃការប្រែប្រួលថ្លៃប្រេងឥន្ធនៈសកលលោក៕