សេដ្ឋកិច្ច

កម្ពុជា ខាតបង់ទៅលើតម្លៃអគ្គិសនីជាង១០០លានដុល្លារ ដោយសារសម្ពាធវិបត្តិសង្រ្គាមអ៊ុយក្រែន

បានផុស

៣ years មុន

នៅ

ថ្ងៃពុធ ៦ កក្កដា ២០២២

ដោយ

កម្ពុជា បាននិងកំពុងខាតបង់ទៅលើតម្លៃអគ្គិសនីជាង ១០០លានដុល្លារ ក្រោយរងផលប៉ះពាល់ពីវិបត្តិសង្គ្រាមរុស្ស៊ី និងអ៊ុយក្រែន ដែលបានធ្វើឱ្យតម្លៃថាមពល ឥន្ធនៈ ឧស្ម័ន និងអគ្គិសនីឡើងថ្លៃខ្ពស់ ក្នុងនោះកម្ពុជា ក៏រងផលប៉ះពាល់ផងដែរ។ ទន្ទឹមនឹងការខាតបង់នេះ ម្តេចតេជោ ហ៊ុន សែន បានស្នើឱ្យប្រជាពលរដ្ឋ និងគ្រប់ស្ថាប័នទាំងអស់ ជួយសន្សំសំចៃលើការប្រើប្រាស់អគ្គិសនី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសម្តេចតេជោ កន្លងមករាជរដ្ឋាភិបាល បានខិតខំទប់ស្កាត់ការឡើងថ្លៃអគ្គិសនី សម្រួលដល់ការងារអាជីវកម្ម និងជីវភាពរស់នៅរបស់បងប្អូនប្រជាពលរដ្ឋតាមរយៈការ ចេញថ្លៃខាតបង់ទៅដល់អគ្គិសនីកម្ពុជា ដែលគិតជាទឹកប្រាក់រហូតដល់ជាង១០០លានដុល្លាររួចទៅហើយ។

លើសពីនេះទៀត សម្តេចតេជោ ហ៊ុន សែន ក៏បានអំពាវនាវឱ្យពលរដ្ឋ និងស្ថាប័នទាំងអស់ ផ្តើមចេញពីស្ថាប័នរដ្ឋមុនគេឱ្យចូលរួមសន្សំសំចៃការប្រើប្រាស់អគ្គិសនី តាមដែលអាចធ្វើទៅបាន ដើម្បីទប់ស្ថានការណ៍ជាសកលនៃវិបត្តិថាមពល ដែលកំពុងរងផលប៉ះពាល់ ដោយសារតែសង្គ្រាមរុស្ស៊ី-អ៊ុយក្រែន។

សម្តេចថ្លែងបែបនេះ នៅក្នុងពិធីសំណេះសំណាល ក៏ដូចជាផ្តល់នូវដំបូន្មានមួយចំនួនជូនដល់ គណៈប្រតិភូ កីឡា អាស៊ានប៉ារ៉ាហ្គេម (ASEAN Para Games) នាព្រឹកថ្ងៃទី ០៦ ខែ កក្កដា ឆ្នាំ ២០២២។

យោងតាមតារាងនៃការប្រើប្រាស់អគ្គិសនីរបស់អគ្គិសនីកម្ពុជា បានបានកំណត់ថា បរិមាណនៃការប្រើប្រាស់ក្នុងមួយខែចាប់ ១០ គីឡូវ៉ាត់ចុះក្រោមតម្លៃ ៣៨០ រៀលក្នុងគីឡូវ៉ាត់ម៉ោង, ពី ១១ គីឡូដល់ ៥០ គីឡូ តម្លៃ ៤៨០ រៀល, ពី ៥១ គីឡូ ដល់ ២០០ គីឡូ តម្លៃ ៦១០ រៀល និងអ្នកប្រើប្រាស់ចាប់ពី ២០១ គីឡូឡើងទៅតម្លៃ ៧៣០ រៀល ដែលតារាងនេះ គឺរដ្ឋមានកម្មវិធីផ្តល់អត្រាអនុគ្រោះក្រោមថ្លៃដើម មានន័យថារដ្ឋបំពេញខាតឱ្យអ្នកប្រើប្រាស់ថាមពលអគ្គិសនីរួចហើយ។

របាយការណ៍បានបង្ហាញថា ក្នុងឆ្នាំ២០២១កន្លងទៅ កម្ពុជាទទួលបានទុនវិនិយោគសរុបលើវិស័យ អគ្គិសនី ប្រមាណ ១ ៦០០ លានដុល្លារអាម៉េរិក ក្នុងនោះការវិនិយោគដោយអគ្គិសនីកម្ពុជា មានទឹក ប្រាក់ ៦០០លានដុល្លារអាម៉េរិក និងការវិនិយោគដោយវិស័យឯកជនមានទឹកប្រាក់ចំនួន ១០០០ លានដុល្លារអាម៉េរិក៕