មូលហេតុសំខាន់ចំនួន ២ ជាដើមចមទម្លាក់ តម្លៃប្រេងពិភពលោក

តម្លៃប្រេងពិភពលោកបានធ្លាក់ចុះកាលពីថ្ងៃអង្គារ ដោយសារតែការរឹតត្បិតថ្មីនៃជំងឺកូវីដ ១៩ នៅក្នុងប្រទេសចិន ដែលជាប្រទេសនាំចូលប្រេងឆៅដ៏ធំបំផុតរបស់ពិភពលោក និងការភ័យខ្លាចតម្រូវការសេដ្ឋកិច្ចពិភពលោកធ្លាក់ចុះ ។

ប្រេងឆៅអន្តរជាតិម៉ាក Brent បានជួញដូរក្នុងតម្លៃ ១០៥.៣៨ ដុល្លារក្នុងមួយបារ៉ែល ពោលថយចុះ ១.៦០ ភាគរយ ខណៈប៉ុន្មានថ្ងៃមុនដាក់លក់ក្នុងតម្លៃ ១០៧.១ ដុល្លារក្នុងមួយបារ៉ែល ។

ដោយឡែកក្រុមហ៊ុនប្រេងឆៅអាមេរិក West Texas Intermediate (WTI) កំពុងដាក់លក់ក្នុងតម្លៃ ១០២.១៧ ដុល្លារក្នុងមួយបារ៉ែល ដោយធ្លាក់ចុះ ១.៨៤ ភាគរយក្នុងរយៈពេលដូចគ្នា ក្រោយជួញដូរក្នុងតម្លៃ ១០៤.០៩ ដុល្លារក្នុងមួយបារ៉ែលកាលពីប៉ុន្មានថ្ងៃមុន ។

ទន្ទឹមនោះការធ្លាក់ចុះតម្លៃនេះក៏កើតឡើង ស្របពេលដែលមានភាពមិនប្រាកដប្រជាផ្នែកសេដ្ឋកិច្ចពិភពលោក បន្ទាប់ពីខ្ទង់ចំណាយរបស់អ្នកវិនិយោគកំពុងធ្លាក់ចុះ ។

ចំណែកនៅក្នុងប្រទេសចិនវិញ ទីក្រុងជាច្រើនកំពុងអនុវត្តវិធានការទប់ស្កាត់ការផ្ទុះឡើងថ្មីនៃជំងឺកូវីដ ១៩ ដែលធ្វើឲ្យប៉ះពាល់ដល់តម្លៃប្រេង និងទីផ្សារពិភពលោក ។

គួរបញ្ជាក់ថា ពាក់ព័ន្ធនឹងតម្លៃប្រេងឡើងថ្លៃនាពេលកន្លងមក គឺដោយសារតែកត្តា​សំខាន់​មួយ​កើតចេញពី​សង្គ្រាម​រុស្ស៊ី​-​អ៊ុយក្រែន ក៏ដូចជាការដាក់ទណ្ឌកម្មរបស់លោកខាងលិចលើទីក្រុងមូស្គូជុំវិញសង្គ្រាមមួយនេះ ហើយវាក៏បានរំខានដល់លំហូរពាណិជ្ជកម្មសម្រាប់ប្រេងឆៅ និងប្រេងឥន្ធនៈផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ចម្លើយសារភាពថ្មី ៖ ជនដៃដល់គុំតាំងពីជំនាន់ជីតាលោក Abe មកម្ល៉េះ