អ្នកស្រាវជ្រាវ៖ មាសកំពុងចុះថ្លៃតែគប្បីកុំទាន់​ទិញពេលនេះ ព្រោះនៅបន្តចុះទៀត

នៅក្នុងសប្តាហ៍នេះ ហាងឆេងមាសនៅតែបន្តធ្លាក់ចុះតម្លៃដដែល ដោយ១អោន ស្មើប្រមាណ៨ជី ៣ហ៊ុន មានតម្លៃ១,៧២០ដុល្លារ ខណៈមាសមួយតម្លឹងធ្លាក់ចុះពីតម្លៃដើម ២,២០០ ដុល្លារ មកត្រឹម ២,០៦០ដុល្លារ។

មានសាធារណជនជាច្រើនសួរថា បើតម្លៃមាសធ្លាក់ចុះបែបនេះ គួរទិញទុកលក់ចំណេញពេលក្រោយដែរទេ?

លោក ឡុង សំណាង  ប្រធានផ្នែកប្រឹក្សាយោបល់ហិរញ្ញវត្ថុ នៃក្រុមហ៊ុន Golden FX Link Capital បានឆ្លើយនឹងសំណួរនេះថា« សម្រាប់ខ្ញុំ គិតថា មិនគួរទាន់ទិញទេ គឺមូលហេតុមាសនៅបន្តចុះថែមទៀត ដោយខ្ញុំមិនទាន់មើលឃើញមានចំណុចណាមួយ បញ្ជាក់ថា វាបញ្ចប់ការធ្លាក់ចុះថ្លៃនៅឡើយទេ»។

ហេតុផលនៃការបន្តធ្លាក់ចុះថ្លៃមាសនេះ លោក ឡុង សំណាង បានពន្យល់ទៀតថា គឺពាក់ព័ន្ធនឹងគោលនយោបាយ ដូចជាធនាគារកណ្តាលរបស់សហរដ្ឋអាមេរិកបានដំឡើងថ្លៃអត្រាការប្រាក់ខ្ពស់ជាងមុន ដើម្បីរក្សាតម្លៃលុយរបស់ខ្លួន កាត់បន្ថយអតិផរណាដែលកំពុងកើនឡើងក្នុងប្រទេស ឬផលវិជ្ជមានមួយចំនួន ដែលធ្វើឱ្យលុយដុល្លារឡើងថ្លៃ បួករួមទាំងអត្រាអ្នកមានការងារធ្វើនៅសហរដ្ឋអាមេរិក នៅក្នុងខែមុនក៏មានស្ថានភាពល្អ ដូច្នេះជាកត្តារុញ​ច្រានឱ្យ​តម្លៃមាសបន្តធ្លាក់ចុះថ្លៃបន្តិចទៀត។ លើសពីនេះទៀត ក៏អាចបណ្តាលមកពីការបញ្ចេញមាស​លក់ពីបណ្តា​ប្រទេសមួយចំនួននៅលើពិភពលោក។

អ្នកស្រាវជ្រាវ និងតាមដានទីផ្សារមាសរូបនេះ បានណែនាំថា បងប្អូនអាចរង់ចាំទិញពេលមាសធ្លាក់ចុះតម្លៃដល់ ១,៨០០ ដុល្លារ ទៅ ១,៩០០ដុល្លារ ក្នុងមួយតម្លឹង អាចនឹងទុកលក់បានចំណេញច្រើន។

ដូចគ្នានេះដែរ ម្ចាស់ហាងមាសពេជ្រ ទី មង្គល បានផ្តល់ជាទស្សនថា សម្រាប់បងប្អូនដែលចង់ចំណេញលឿន​ពីការជួញដូរមាស មិនគួរទិញនៅពេលនេះនោះទេ ព្រោះមាសអាចនឹងបន្តធ្លាក់ចុះថ្លៃថែមទៀត។ ផ្ទុយទៅវិញ លោកថា ប្រសិនបើអ្នកចង់វិនិយោគទិញទុកលក់ចំណេញរយៈពេលវែងពីរទៅបីឆ្នាំខាងមុខ គួរតែទិញនាពេលឥឡូវនេះបាន។

លោក ទី មង្គល បានឱ្យដឹងទៀតថា ទីផ្សារទិញលក់មាសរយៈពេលប៉ុន្មានថ្ងៃចុងក្រោយនេះ ពុំសូវល្អប្រសើរនោះទេ ដោយសារអ្នកខ្លះរង់ចាំមើលឱ្យចុះថ្លៃបន្តទៀត។ ភាគច្រើននៃអ្នកទិញមាសទុកចំណេញ រង់ចាំដល់តម្លៃមាសនៅថេរ លែងចុះថ្លៃទើបពួកគេចាប់ផ្តើមទិញ។

នៅក្នុងកាលៈទេសៈនេះ ហាងមាសភាគច្រើន រងផលប៉ះពាល់ខ្លះទៅលើទុនវិនិយោគ ដោយសារការលក់ចេញធ្លាក់ចុះ ប៉ុន្តែមិនធ្ងន់ធ្ងរនោះទេ។ នេះបើតាមលោក ទី មង្គល។

សូមបញ្ជាក់ថា មាស១អោន ស្មើប្រមាណ៨ជី ៣ហ៊ុន និង ១គីឡូមាស ស្មើនឹង ២៦តម្លឹង ៦ជី ៧ហ៊ុន៕