កម្ពុជា នឹងមានតម្រូវការប្រេងកើនឡើងដល់ជិត ៥លានតោន នៅឆ្នាំ ២០៣០

កម្ពុជា ចាំបាច់ត្រូវតែមានការវិនិយោគពីក្រុមហ៊ុន និងវិនិយោគិនផ្សេងៗបន្ថែមទៀត លើការវិស័យប្រេង ដើម្បីឆ្លើយតប​ឱ្យបានទាន់ពេលវេលា ស្របពេលដែលមានការសិក្សាថា តម្រូវការប្រេងនៅកម្ពុជា នឹងកើនឡើងដល់ ៤.៨លានតោននៅឆ្នាំ២០៣០។

យោងតាមការសិក្សារបស់វិទ្យាស្ថានស្រាវជ្រាវសេដ្ឋកិច្ច សម្រាប់អាស៊ីអាគ្នេយ៍ និងអាស៊ីបូព៌ា (ERIA) តម្រូវការ​ផលិតផល​ប្រេងកាត ក្នុងប្រទេសកម្ពុជានឹងកើនឡើងពី ២.៨លានតោន នៅឆ្នាំ២០២០ដល់ ៤.៨លានតោន​នៅឆ្នាំ២០៣០ និងបន្តកើនដល់ ៨.៣លានតោននៅឆ្នាំ២០៤០ ដែលទាមទារឱ្យមានឱកាស​វិនិយោគជាច្រើន​ថែមទៀតលើវិស័យនេះ ដើម្បីឆ្លើយតបទៅនឹងតម្រូវការ។ លទ្ធផលនៃការសិក្សានេះ បង្ហាញដោយលោក ស៊ុយ សែម រដ្ឋមន្ត្រីក្រសួងរ៉ និងថាមពល នៅក្នុងពិធីបើកសន្និសីទប្រេង ឧស្ម័ន និងថាមពល នៅព្រឹកថ្ងៃទី២៧ ខែកក្កដា ឆ្នាំ២០២២។

លោក ស៊ុយ សែម បានបន្តថា ដើម្បីឆ្លើយតបនឹងតម្រូវការនេះ រាជរដ្ឋាភិបាលក៏បានលើកទឹកចិត្ត ដល់វិស័យឯក​ជនជាតិ និងអន្តរជាតិ វិនិយោគលើអាជីវកម្មចម្រាញ់ ការនាំចូល ការស្ដុក ការដឹកជញ្ជូន និងការលក់ចែកចាយ ប្រេងកាត និងផលិតផលប្រេងកាត ដើម្បីធានានូវការផ្គត់ផ្គង់ប្រេង និងឧស្ម័នដល់អ្នកប្រើប្រាស់ និងការ​អភិវឌ្ឍវិស័យផ្សេងៗទៀត។

បើតាមលោករដ្ឋមន្រ្តី បច្ចុប្បន្នកម្ពុជា បានរកឃើញធនធានប្រេងកាត នៅដែនសមុទ្រកម្ពុជា នៅប្លុក A ដែលមានលក្ខណៈអាចធ្វើពាណិជ្ជកម្មបាន និងទទួលបានដំណក់ប្រេងដំបូង កាលពីថ្ងៃទី២៩ ខែធ្នូ ឆ្នាំ២០២០ កន្លងមកនេះ។ តាមរយៈព្រឹត្តិការណ៍ដ៏សំខាន់នេះ បានប្រែក្លាយកម្ពុជា ទៅជាប្រទេសផលិតប្រងមួយ ក្នុងចំណោមប្រទេសផលិតប្រេងជាច្រើន នៅលើពិភពលោក។

សូមបញ្ជាក់ថា កម្ពុជាមានប្រវត្តិ នៃការសិក្សាស្រាវជ្រាវលក្ខណៈភូគព្ភសាស្ត្រ ដែលបានធ្វើឡើងដោយក្រុមហ៊ុន​ប្រេងកាតអន្តរជាតិមួយចំនួន ដូចជា Elf, Esso, Enterprise Oil, PTT, Premier Oil, Chevron, PVEP, JOGMEC និង MOECO ដោយបានចងក្រងទិន្នន័យស៊ីស្មិកមួយចំនួន និងខួងអណ្ដូងស្វែងរុករកចំនួន៣៤។

រាជរដ្ឋាភិបាល ក៏បានអនុញ្ញាតឱ្យក្រុមហ៊ុន Petroleum Geoscience Service (PGS)
ធ្វើសម្រង់ទិន្នន័យស៊ីស្មិក 2D និង 3D មួយចំនួនទៀត ទាំងដែនសមុទ និងដែនគោក កាលពីឆ្នាំ២០០៦ សម្រាប់ជាមូលដ្ឋានក្នុងការចាប់ផ្ដើមសិក្សាស្រាវជ្រាវ សក្តានុពលធនធានប្រេងកាតបន្តទៀត៕