សេដ្ឋកិច្ច

ថៃ នាំចេញផ្លែឈើទៅ ចិន រហូតដល់ជាង ១.១៦ លានតោន

បានផុស

២ years មុន

នៅ

ថ្ងៃសៅរ៍ ៣០ កក្កដា ២០២២

ដោយ

លោក ថាណាកន អ្នកនាំពាក្យរដ្ឋាភិបាលថៃបាននិយាយថា លោកនាយករដ្ឋមន្ត្រី ប្រាយុទ្ធ ចាន់អូចា បានសម្តែងក្តីរីករាយ និងថ្លែងអំណរគុណចំពោះក្រុមការងារពាក់ព័ន្ធក្នុងវិស័យនាំចេញដែលបានធ្វើឲ្យមានការរីកចម្រើនជាវិជ្ជមាន និងអភិវឌ្ឍន៍សមត្ថភាពក្នុងការនាំចេញផលិតផលថៃប្រកបដោយប្រសិទ្ធភាព ក្រោយទទួលបានលទ្ធផលជាក់ស្តែងលើការនាំចេញផ្លែឈើថៃទៅកាន់ប្រទេសចិនរហូតដល់ជាង ១.១៦លានតោន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើផ្អែកតាមទិន្នន័យរបស់ក្រសួងពាណិជ្ជកម្ម តួលេខក្នុងរយៈពេល ៦ ខែដើមឆ្នាំនេះ (ខែមករា ដល់ខែមិថុនា ឆ្នាំ២០២២) ការនាំចេញរបស់ថៃមានតម្លៃសរុប ១៤៩,១៨៤.៨ លានដុល្លារអាមេរិក កើនឡើង ១២.៧ ភាគរយស្មើនឹង ៣ ដងសម្រាប់ទិសដៅនាំចេញពេញមួយឆ្នាំដែលបានគ្រោងទុក ៤ ទៅ ៥ ភាគរយ ដោយការនាំចេញកសិផលកសិកម្ម-ឧស្សាហកម្ម គឺជាកត្តារួមចំណែកយ៉ាងសំខាន់ដល់កំណើននៃការនាំចេញក្នុងខែមិថុនា ដែលមានតម្លៃ ២៦,៥៥៣.១ លានដុល្លារអាមេរិក កើនឡើង ១១.៩ ភាគរយ បើធៀបនឹងរយៈពេលដូចគ្នាកាលពីឆ្នាំមុន ។

សម្រាប់ការនាំចេញផ្លែឈើរបស់ថៃ ជាពិសេសការនាំចេញទៅកាន់ប្រទេសចិន នាយកដ្ឋានកសិកម្មបានបង្ហាញពីការនាំចេញជាង ១ លានតោនចំពោះផ្លែឈើស្រស់របស់ថៃដែលនាំចេញទៅកាន់ប្រទេសចិនក្នុងឆមាសទីមួយនៃឆ្នាំនេះ ពោលគឺស្មើនឹង ១.១៦ លានតោន គិតជាទឹកប្រាក់ជាង ៩២ ពាន់លានបាត ដែលក្នុងនោះទុរេនថៃបាននាំចេញជាង ៦៧ ម៉ឺនតោន គិតជាទឹកប្រាក់ជាង ៧២ ពាន់លានបាត ។

ដោយសារការមានទំនុកចិត្តលើគុណភាព រសជាតិ និងតម្លៃកសិផលថៃដល់អ្នកប្រើប្រាស់ចិន វាក៏កំពុងជួយសម្រួលដល់សហគ្រិនដែលនាំចេញផ្លែឈើស្រស់របស់ថៃទៅប្រទេសចិនបានកាន់តែប្រសើរ ហើយបច្ចុប្បន្នការនាំចេញផ្លែឈើថៃទៅកាន់ប្រទេសចិនជាប់ចំណាត់ថ្នាក់លេខ ១ ៕

ប្រែសម្រួលដោយ ៖ គង់ សំអាន

ប្រភព ៖ Naewna