ប្រេងសាំងធម្មតាចុះថ្លៃ ៥០រៀល នៅសល់ ៤,៧៥០រៀល និងម៉ាស៊ូត ៥,១៥០រៀល

ក្រសួងពាណិជ្ជកម្ម បានប្រកាសនៅថ្ងៃនេះថា តម្លៃប្រេងសាំងធម្មតា លក់ក្នុងមួយលីត្រ ៤,៧៥០រៀល និងប្រេងម៉ាស៊ូតតម្លៃ ៥,១៥០រៀល ដោយអនុវ​ត្តចាប់ពីថ្ងៃទី ០១ ខែសីហា ឆ្នាំ ២០២២ ដល់ថ្ងៃទី ១១ ខែ សីហា។

 តម្លៃប្រេងឥន្ធនៈថ្មីនេះ បើធៀបនឹងតម្លៃកាលពីសប្តាហ៍មុន ប្រេងសាំងចុះថ្លៃចំនួន ៥០រៀល និងប្រេងម៉ាស៊ូត ចុះថ្លៃចំនួន ១៥០រៀល ពីតម្លៃដើម។

បច្ចុប្បន្ននេះប្រេងឥន្ធនៈដែលកម្ពុជាប្រើប្រាស់ នាំចូលពីប្រទេសសិង្ហបុរី ថៃ និងវៀតណាម។ អ្នកនាំពាក្យក្រសួង​ពាណិជ្ជកម្ម ធ្លាប់បានលើកឡើងថា តម្លៃប្រេងសាំងនៅកម្ពុជា ប្រែប្រួលទៅតាមទីផ្សារអន្តរជាតិ នៅពេលដែលទីផ្សារប្រេងអន្តរជាតិចុះថ្លៃ នោះប្រេងលក់នៅកម្ពុជា ក៏ចុះ​ថ្លៃដូចគ្នា ព្រោះប្រេងដែលកម្ពុជា ប្រើប្រាស់សព្វថ្ងៃ គឺនាំចូលពីបរទេស។

ក្រុមហ៊ុនលក់រាយនៅកម្ពុជា ដែលនាំចូលប្រេងសាំង មានដូចជា ក្រុមហ៊ុនតេលា សូគីម៉ិច ប៉ាប៉ា សាវីម៉ិច លឹមឡុង និងក្រុមហ៊ុនមួយចំនួនទៀត។ ចំណែកក្រុមហ៊ុនបរទេស ដែលនាំចូលប្រេងឥន្ធនៈមកស្រុកខ្មែរ រួមមាន ក្រុមហ៊ុនតូតាល់ កាល់តិច និងក្រុមហ៊ុនភីធីធី។ នេះបើតាមការបញ្ជាក់របស់លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម។

សូមបញ្ជាក់ថា ក្រសួងពាណិជ្ជកម្ម ចេញតម្លៃលក់រាយរៀងរាល់ ១០ថ្ងៃម្តង ដើម្បីឆ្លើយតបឱ្យទាន់និន្នាការនៃការប្រែ​ប្រួលថ្លៃប្រេងឥន្ធនៈនៅលើសកលលោក៕