អ្នកនាំពាក្យ ៖ រាជរដ្ឋាភិបាល បានត្រៀមថវិការួចជាស្រេច​សម្រាប់ផលប៉ះពាល់​នៃអតិផរណា

រាជរដ្ឋាភិបាលកម្ពុជា បានត្រៀមថវិការួចជាស្រេច ក្នុងការទប់ទល់ជាមួយអតិផរណានៅក្នុងប្រទេស ដើម្បីជួយដល់ប្រជាជនក្រីក្រ  បើសិនករណីអតិផរណាឡើងដល់កម្រិតខ្ពស់ ដែលតម្រូវឱ្យដោះស្រាយជាបន្ទាន់។ នេះជាការបញ្ជាក់របស់លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ នៅក្នុងសន្និសីទស្តីពី “សមិទ្ធផលដែលសម្រេចបានក្នុងរយៈពេល ៥ឆ្នាំ កន្លងមក របស់ក្រសួងសេដ្ឋកិច្ច និងហិរញ្ញវត្ថុ” ដែលរៀបចំដោយ អង្គភាពអ្នកនាំពាក្យរដ្ឋាភិបាល នៅថ្ងៃទី ២ សីហា ឆ្នាំ ២០២២។

លោក មាស សុខសេនសាន បានលើកឡើងឡើងថា រាជរដ្ឋាភិបាលមានថវិកាបម្រុងគ្រប់គ្រាន់ ក្នុងការជួយដល់ប្រជាពលរដ្ឋក្រីក្រ ដើម្បីឆ្លើយតបទៅនឹងបញ្ហាអតិផរណា ប្រសិនបណ្តាលមកពីរលកទី២ នៃកូវីដ-១៩ ។ លោកបានបញ្ជាក់បន្ថែមថា ចំពោះទំហំថវិកា គឺអាស្រ័យ ទៅលើចំនួនប្រជាពលរដ្ឋក្រីក្រជាក់ស្តែង ទោះបីជារដ្ឋមានថវិកាបម្រុងក៏ដោយ តែក៏មិនអាចចំណាយហួសពីតម្រូវការដែរ។

អ្នកនាំពាក្យរូបនេះ បានសង្កត់ធ្ងន់ថា ក្នុងរយៈពេលប៉ុន្មានឆ្នាំចុងក្រោយនេះ រដ្ឋាភិបាលមានថវិកាគ្រប់គ្រាន់ ដោយមិនចាំបាច់ស្វែងរកជំនួយពីខាងក្រៅនោះឡើយ។

រាជរដ្ឋាបាលបានចំណាយថវិកាប្រមាណជាង ៧០០លានដុល្លារអាមេរិក ជួយដល់ប្រជាពលរដ្ឋក្រីក្រ និងងាយរងគ្រោះ ដោយសារវិបតិ្តកូវីដ-១៩។ ចំពោះការចំណាយនេះ គឺជាថវិការបស់ជាតិសុទ្ធសាធ។

អតិផរណានៅកម្ពុជា បានកើនឡើងជាបន្តបន្ទាប់ក្នុងខែដំបូងនៃឆ្នាំនេះ ពី ១.២២% ក្នុងខែកុម្ភៈ ដល់ ១.៦១% ក្នុងខែមីនា និងហក់ឡើងដល់ ៧.២% ក្នុងខែឧសភា ដែលជាកំណត់ត្រាខ្ពស់បំផុត នៅក្នុងទសវត្សរ៍ចុងក្រោយនេះ។ នេះបើយោងតាមធនាគារជាតិនៃកម្ពុជា ( NBC) ។ អត្ថបទ៖ នាង រតនៈ