ទំហំទឹកប្រាក់ពាណិជ្ជកម្ម ចិន-តៃវ៉ាន់ មុនការមកដល់របស់លោកស្រី Pelosi

ប្រទេសចិនបានដាក់កម្រិតពាណិជ្ជកម្មរបស់ខ្លួនជាមួយតៃវ៉ាន់ ដោយសារតែដំណើរទស្សនកិច្ចរបស់ប្រធានសភាអាមេរិកលោកស្រី Nancy Pelosi ទៅកាន់កោះដែលគ្រប់គ្រងដោយលទ្ធិប្រជាធិបតេយ្យមួយនេះ ហើយវាត្រូវបានគេមើលឃើញថា ជាការខាតប្រយោជន៍ដ៏ធំមួយរបស់តៃវ៉ាន់ ។

ប្រទេសមហាអំណាចចិន គឺជាដៃគូពាណិជ្ជកម្មដ៏ធំបំផុតរបស់តៃវ៉ាន់ ខណៈការនាំចេញរបស់កោះនេះទៅកាន់ចិនដីគោក និងហុងកុងស្ថិតក្នុងទំហំទឹកប្រាក់រហូតដល់ ១៨៨.៩ ពាន់លានដុល្លារ ក្នុងឆ្នាំ ២០២១ ។

ការខាតបង់ដ៏ធំសម្បើមរបស់កោះតៃវ៉ាន់ក៏កើតឡើង ស្របពេលដែលរដ្ឋបាលគយចិនទើបតែប្រកាសពីផ្អាកការនាំចូលផលិតផលអាហារតៃវ៉ាន់ជាង ២,០០០ មុខបន្ថែមទៀត ក្នុងចំណោមផលិតផលអាហារប្រហែល ៣,២០០ មុខ ក៏ដូចជាបញ្ឈប់ការនាំចេញខ្សាច់ ដែលជាសម្ភារៈដ៏សំខាន់សម្រាប់ប្រើប្រាស់ក្នុងការសាងសង់ លែងនាំចូលផ្លែក្រូចឆ្មារ និងប្រភេទត្រីមួយចំនួនរបស់តៃវ៉ាន់ផងដែរ ។

បើយោងតាមស្ថិតិរបស់រដ្ឋាភិបាលចិនបានឲ្យដឹងថា គ្រាន់តែខ្សាច់ និងក្រួស តៃវ៉ាន់បាននាំចូលរហូតដល់ ៥.៧ លានតោន ក្នុងឆ្នាំ ២០២០ ដែលក្នុងនោះជាង ៩០ ភាគរយបានមកពីប្រទេសចិន ខណៈខ្សាច់ធម្មជាតិមាន ៨ ភាគរយនៃចំនួនសរុបនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ ចិន បិទនាំចេញ-នាំចូលទំនិញ តៃវ៉ាន់ ២ ពាន់មុខបន្ថែមទៀត