៦ខែឆ្នាំនេះ មានរោងចក្របង្កើតថ្មីជាង១០០​ក្រុមហ៊ុន

លោក  ហេង សុខគង់ រដ្ឋលេខាធិការក្រសួងឧស្សាហកម្មវិទ្យាសាស្ត្របច្ចេកវិទ្យានិងនវានុវត្តន៍បានមានប្រសាសន៍ថា នៅក្នុងរយៈពេល៦ខែឆ្នាំ២០២២នេះ វិស័យឧស្សាហកម្មមានការរីកចំរើនដោយមានមានរោងចក្រ​បង្កើតថ្មីចំនួន​១០៨ក្រុមហ៊ុន ក្នុងចំណោមរោងចក្រសរុបចំនួន១៩៤៧ មានទន់វិនិយោគជាង ១៥,៧ពាន់លាននដុល្លារអាមេរិក។

ថ្លែងនៅក្នុងពិធីបើកកម្មវិធីពានរង្វាន់សហគ្រិនវ័យក្មេងនៅរសៀលថ្ងៃទី៥ ខេសីហា លោកបានបន្តថា នេះគឺជាមោទន​ភាពមួយសម្រាប់ប្រទេសកម្ពុជា ខណៈនៅលើពិភពលោកកំពុងប្រឈមតែជាកាលានុវត្តភាពដ៏សំខាន់ ដោយសារកម្ពុជា បានចាក់វ៉ាក់សាំងមានអត្រាខ្ពស់និងបានបើកដំណើរការប្រទេសឡើងវិញ។

ចំណែកផលិតភាពក្នុងរយៈពេល៦ខែឆ្នាំ២០២២នេះ មានប្រមាណជាង ៧ពាន់លានដុល្លារអាមេរិកបើធៀប​ទៅនឹងរយៈ​ពេលដូចគ្នាឆ្នាំ២០២១មានការកើនឡើងប្រមាណជាង១៧៥ភាគរយតែបើធៀបនឹង១ឆ្នាំ២០២១ ឃើញថា ជិតប្រហាក់​ប្រហែលគ្នា ខណៈឆ្នាំ២០២១ផលិតភាពមានតែជាង៨ពាន់លានដុល្លារប៉ុណ្ណោះ។

ពាក់ព័ន្ធនឹងការនាំចេញកង់ទៅសហភាពអឺរ៉ុបវិញ លោក រដ្ឋលេខាធិការបានបញ្ជាក់ថា ឆ្នាំ២០២១ កម្ពុជា បានក្លាយជាប្រទេសជាប់លំដាប់ថ្នាក់ទី១ នៅលើពិភពលោកដែលបាននាំចេញកង់ទៅសហភាពអឺរ៉ុបច្រើន​ជាងគេគឺប្រមាណ២៤ភាគរយដែលមានតម្លៃប្រមាណ៦០០លានដុល្លារអាមេរិក ប្រួទេសចិនឈរ លំដាប់ថ្នាក់លេខ២​មាន១៧ភាគរយនិងតៃវ៉ាន់ជាប់លេខ៣មាន១១ភាគរយ ខណៈឆ្នាំ២០១៧ និងឆ្នាំ២០១៨ តៃវ៉ាន់ជាប់លេខ១ ចិនឈរលេខ២និងកម្ពុជាឈរលេខ៣៕ សំអឿន