សមាគមពាណិជ្ជកម្មកម្ពុជា-ចិន ផ្សារភ្ជាប់រវាង​អ្នកវិនិយោគ និងសហគ្រិន​ទៅកាន់អន្តរជាតិ

សមាគមពាណិជ្ជកម្មកម្ពុជា ចិន ហៅកាត់ថា CCCA កើតចេញពីលទ្ធផលនៃកិច្ចព្រមព្រៀងរួមរបស់អ្នកវិនិយោគ សហគ្រិនក្នុងបណ្តាប្រទេស និងតំបន់នានានៅអាស៊ី រួមមាន ចិន កម្ពុជា ហុងកុង សិង្ហបុរី ដើម្បីបង្កើតជាស្ពាន ផ្សារភ្ជាប់ទំនាក់ទំនងរវាងសហគ្រិន អ្នកវិនិយោគដែលមានបទពិសោធន៍វិនិយោគក្នុងប្រទេសកម្ពុជា ជាមួយសហគ្រិន និងអ្នកវិនិយោគមកពីបណ្តាប្រទេសក្នុងទ្វីបអាស៊ី ដែលមានបំណងចង់មកវិនិយោគក្នុងប្រទេសកម្ពុជា។ បេសកកម្មរបស់ CCCA រួមមានការលើកកម្ពស់ពាណិជ្ជកម្ម និងការអភិវឌ្ឍឧស្សាហកម្ម ព្រមទាំងគាំទ្រក្រុមហ៊ុនចាប់ផ្តើមអាជីវកម្ម និងបំពេញទំនួលខុសត្រូវសង្គមឲ្យកាន់តែប្រសើរឡើង។

លោកបណ្ឌិត ប៊ែន លី (Ben Li) ប្រធានកិត្តិយស និងជាអគ្គនាយកស្ថាបនិកគម្រោង Urban Village & Factory Phnom Penh បានថ្លែងទៅកាន់សមាជិកថ្មីប្រមាណជាង ២០០នាក់ នៅសមាគមន៍ពាណិជ្ជកម្មកម្ពុជា ចិន (CCCA) ដែលមានការិយាល័យតំណាងប្រចាំនៅកម្ពុជា និងហុងកុង នាពេលថ្មីៗនេះថា សមាគមពាណិជ្ជ​កម្មកម្ពុជា-ចិន ផ្តោតសំខាន់លើការគាំទ្រវិស័យ SME។ លោកសង្កត់ធ្ងន់ថា បើទោះបីជា CCCA មានឈ្មោះជា សមាគមពាណិជ្ជកម្មកម្ពុជា-ចិន តែយើង​ស្វាគមន៍អ្នកជំនួញមិនថា ខ្មែរ ចិន នោះទេ គឺទទួលជាសមាជិកទាំងអស់។ ជាក់ស្តែងលោកថា «យើងមានទំរង់អន្តរជាតិដែលមានសហគ្រិនមកពីសហរដ្ឋអាមេរិក អឺរ៉ុប ជប៉ុន កូរ៉េ អ្វីដែលសំខាន់ គឺម្នាក់ៗមានសិទ្ធិក្នុងការសម្រេចចិត្ត។ ហេតុផលដែលយើងបង្កើត CCCA គឺអំឡុងកូវីដ មានអាជីវកម្មជាច្រើនជួប​បញ្ហានៅកម្ពុជា CCCA ផ្តល់ឱកាសឲ្យពួកគាត់ជួបគ្នារៀងរាល់ខែ និងមាន Networking។ នៅ Factory Phnom Penh គឺមានជាង១០០ Start-up ដែលពួកគាត់ជួយគ្នាហើយអាចបន្តរស់ក្នុងកូវីដ។ នេះជាកម្មវិធីដែល​គាត់អាចជួបគ្នា និងស្វាគមន៍សមាជិកថ្មី»។

បន្ថែមលើនេះ ប្រធានសមាគមពាណិជ្ជកម្មកម្ពុជា ចិនប្រចាំនៅកម្ពុជា Dr.Choi បានបញ្ជាក់ថា វិនិយោគិនចិន ហុងកុង ម៉ាឡេស៊ី សិង្ហបុរី អាចនឹងត្រលប់មកវិនិយោគលើវិស័យផ្សេងៗ ជាពិសេសអចលនទ្រព្យ និងសំណង់បន្ថែមក្នុង​ទីផ្សារកម្ពុជា កាន់តែច្រើន តាមរយៈការកៀរគរវិនិយោគិន ដែលជាដៃគូស្រាប់ក្នុងសមាគមន៍ និងដៃគូថ្មីៗ ស្របពេល​ដែលកម្ពុជា បានផ្តល់នូវលក្ខខណ្ឌអំណោយផលច្រើនទៅលើការវិនិយោគ។

ចំណែកលោកស្រី Catherine Chan ជាសហគ្រិនស្ត្រីឆ្នើម ដែលបានបានពានរង្វាន់ជាច្រើន និងជាស្ថាបនិក Gold Fame Group បានលើកឡើងដែរថា «ការចូលរួមជាមួយ CCCA មានអត្ថប្រយោជន៍ជាច្រើន ជាថ្នាលអន្តរជាតិ ដែលអ្នកចូលរួមអាចមានទីផ្សារសម្រាប់អាជីវកម្ម និងហ្វឹកហាត់ខ្លួនឯង។ ពួកគាត់បានណែនាំអាជីវកម្មពីគ្នា​ទៅវិញទៅមក ហើយនៅពេលពួកគាត់មកទីនេះ អ្នកឃើញ co-working space ដែលជាសហគមន៍ដ៏ធំមួយ»។

លោកស្រីបន្តទៀតថា «សាកស្រមៃថា បើអ្នកមកហើយមានមនុស្សជាច្រើន នោះអ្នកនឹងមានអារម្មណ៍ថា អាជីវកម្មដំណើរការល្អ។ ប្រទេសកម្ពុជា មានការអភិវឌ្ឍច្រើន ហេតុផលមួយទៀតនៃការបង្កើត CCCA គឺយើងនឹងបង្កើតកម្មវិធីជាច្រើនទៀតនៅ Urban Village & Factory Phnom Penh ព្រោះយើងចង់​ឲ្យពួកគាត់ពង្រីកអាជីវកម្មរបស់គាត់ មានទំនាក់ទំនងល្អ និងជួយគ្នា»។

សូមបញ្ជាក់ថា សមាគមពាណិជ្ជកម្មកម្ពុជា-ចិន ត្រូវបានបង្កើតឡើងក្នុងឆ្នាំ២០២១ ដោយមានការចូលរួមពី​ក្រុមប្រឹក្សាភិបាល នាយកប្រតិបត្តិ វិនិយោគិន អ្នកដឹកនាំឧស្សាហកម្ម សហគ្រិន និងសមាជិកនៃរាជវង្សកម្ពុជា។

CCCA ផ្តល់ឱកាសដល់ប្រជាជនមកពីប្រទេសផ្សេងៗ គាំទ្រក្រុមហ៊ុនចាប់ផ្តើមអាជីវកម្ម តំណាងឲ្យវិស័យសាធារណៈ នៅក្នុងគោលនយោបាយរបស់រដ្ឋាភិបាលដែលបង្កើត និងអនុវត្ត ចូលរួមក្នុងការងារអភិវឌ្ឍន៍សហគមន៍ ជំរុញការ​យល់ដឹង និងកិច្ចសហប្រតិបត្តិការអន្តរជាតិ បំពេញទំនួលខុសត្រូវសង្គម។ ចំណែក សមាគមពាណិជ្ជកម្មកម្ពុជា ចិន ប្រចាំកម្ពុជាបង្កើតឡើងនៅខែ ឧសភាឆ្នាំ២០២២ ដែលមានការគាំទ្រពីវិនិយោគិន និងសហគ្រិនជាច្រើន​ចូលជា​សមាជិក៕