មកដឹងប្រាក់ចំណូលដែល រុស្ស៊ី កើបពីការលក់ថាមពលឧស្ម័នក្នុងឆ្នាំនេះ

បើយោងតាមឯកសាររបស់ក្រសួងសេដ្ឋកិច្ចរុស្ស៊ីដែលទទួលបានដោយសារព័ត៌មាន Reuters បានឲ្យដឹងថា បរិមាណនាំចេញប្រេងកាន់តែខ្ពស់ រួមជាមួយការកើនឡើងតម្លៃឧស្ម័ន នឹងជំរុញប្រាក់ចំណូលរបស់រុស្ស៊ីពីការលក់ថាមពលដល់ទៅ ៣៣៧.៥ ពាន់លានដុល្លារនៅឆ្នាំ ២០២២ នេះ ពោលកើនឡើង ៣៨ ភាគរយ បើធៀបនឹងឆ្នាំ ២០២១ ។

ការកើនឡើងនៃប្រាក់ចំណូលនេះនឹងជួយជំរុញសេដ្ឋកិច្ចរបស់រុស្ស៊ីក្នុងការប្រឈមមុខនឹងរលកនៃទណ្ឌកម្មរបស់លោកខាងលិច ហើយវាក៏នឹងផ្តល់ឲ្យលោកប្រធានាធិបតី វ្ល៉ាឌីមៀ ពូទីន នូវសាច់ប្រាក់បន្ថែមដើម្បីផ្តល់មូលនិធិដល់ការចំណាយលើផ្នែកយោធា ឬដើម្បីបង្កើនប្រាក់ឈ្នួល និងប្រាក់សោធននិវត្តន៍ នៅពេលដែលសេដ្ឋកិច្ចបានធ្លាក់ចូលទៅក្នុងវិបត្តិសេដ្ឋកិច្ច ក៏ដូចជាអតិផរណាកំពុងបំផ្លាញជីវភាពរស់នៅរបស់ប្រជាជនជាដើម ។

ទោះយ៉ាងណាឯកសាររបស់ក្រសួងបានព្យាករណ៍ថា ប្រាក់ចំណូលនាំចេញថាមពលនឹងថមថយមកត្រឹម ២៥៥.៨ ពាន់លានដុល្លារនៅឆ្នាំ ២០២៣ ប៉ុន្តែនៅតែខ្ពស់ជាងតួលេខឆ្នាំ ២០២១ ដែលមានចំនួន ២៤៤.២ ពាន់លានដុល្លារ ។

ការព្យាករណ៍នោះបានឲ្យដឹងទៀតថា តម្លៃនៃការនាំចេញឧស្ម័នជាមធ្យមនឹងកើនឡើងទ្វេដងនៅឆ្នាំនេះ ពោលឡើងដល់ ៧៣០ ដុល្លារក្នុង ១,០០០ ម៉ែត្រគូប មុនពេលធ្លាក់ចុះបន្តិចម្តងៗរហូតដល់ចុងឆ្នាំ ២០២៥ ។

គួរបញ្ជាក់ថា លំហូរឧស្ម័នពីប្រទេសរុស្ស៊ីដែលជាអ្នកផ្គត់ផ្គង់កំពូលរបស់អឺរ៉ុបកំពុងដំណើរការក្នុងកម្រិតធ្លាក់ចុះនៅឆ្នាំនេះ បន្ទាប់ពីផ្លូវមួយចំនួនត្រូវបានបិទ នៅពេលដែលក្រុងមូស្គូបានបញ្ជូនកងទ័ពទៅអ៊ុយក្រែនក្នុងខែកុម្ភៈ ហើយប្រទេសអឺរ៉ុបមួយចំនួនត្រូវបានកាត់ផ្តាច់ការផ្គត់ផ្គង់ ដោយសារការបដិសេធមិនព្រមបង់ថ្លៃឧស្ម័នជាប្រាក់រូបិ៍របស់រុស្ស៊ី ៕

ប្រែសម្រួលដោយ ៖ ជីវ័ន្ត

ប្រភព ៖ Daily Sabah

ចុចអាន ៖ លោក Zelensky ថា រុស្ស៊ី នឹងបើកការវាយប្រហារសាហាវៗលើ អ៊ុយក្រែន ក្នុងថ្ងៃឯករាជ្យ