ទំហំពាណិជ្ជកម្មកម្ពុជា វៀតណាម កើនឡើង​ជាង ៣ពាន់លានដុល្លារ ក្នុងរយៈពេល ៧ខែ

គិតត្រឹមខែកក្កដា ឆ្នាំ២០២២ ទំហំពាណិជ្ជកម្មរវាងកម្ពុជា និងវៀតណាម សម្រេចបានទឹក ប្រាក់ប្រមាណជាង ៣,៧៦ពាន់លានដុល្លារ ដែលទំហំនេះ មានការកើនឡើង ២២.២ ភាគរយ បើធៀបនឹងរយៈពេលដូចគ្នាក្នុងឆ្នាំ ២០២១។

យោងតាមស្ថិតិរបស់អគ្គនាយកដ្ឋានគយ និងរដ្ឋាករ បង្ហាញថា ចាប់ពីខែមករា ដល់កក្កដា កម្ពុជា បាននាំចេញទំនិញទៅវៀតណាម មានទឹកប្រាក់សរុប ១ ៣២៦ លានដុល្លារ កើនឡើង ៣.៤ភាគរយ ធៀបនឹងរយៈពេលដូចគ្នាកាលពីឆ្នាំមុន។ ចំណែកកម្ពុជា នាំចូលទំនិញពីវៀតណាម ក្នុងទំហំទឹកប្រាក់ ២ ៤៣៩ លានដុល្លារ ដែលមានកំណើន ៣៥ ភាគរយ។

ក្នុងនោះ ទំនិញដែលកម្ពុជានាំចេញសំខាន់ៗភាគច្រើនជាផលិតផលកសិកម្ម មានដូចជា ស្រូវ ដំឡូងមី ស្វាយចន្ទី កៅស៊ូជាដើម ខណៈការនាំចូលវិញមានដែកថែប ប្រេងឥន្ធនៈ ផលិតផលវាយនភណ្ឌជាដើម។

សូមបញ្ជាក់ថា កាលពីឆ្នាំ ២០២១កន្លងទៅ ទំហំពាណិជ្ជកម្មទ្វេភាគីរវាងកម្ពុជា និងវៀតណាម សម្រេចបាន ៩ប៊ីលានដុល្លារ។ រដ្ឋាភិបាលនៃទាំងពីរ បានឯកភាពគ្នាជំរុញទំហំពាណិជ្ជកម្មឱ្យកើនដល់ ១០ប៊ីលានដុល្លារ ក្នុងឆ្នាំ២០២២នេះ៕

អត្ថបទ៖ នាង រតនៈ