ចិនបង្កើតរោងចក្រផលិតកាបូប ខ្សែក្រវាត់ ផ្តល់ការងារជាង ២ ពាន់កន្លែង ក្នុងខេត្តកំពង់ស្ពឺ

ក្រុមហ៊ុនចិន (Milanna Leather Ware M-F-Y Cambodia Co, LTD ) បានបង្កើតរោងចក្រផលិត​កាបូប និងខ្សែក្រវាត់គ្រប់ប្រភេទ មានទីតាំងស្ថិតនៅក្នុងភូមិក្របីត្រាំ ឃុំជង្រុកស្រុកគងពិសី ខេត្តកំពង់ស្ពឺ ដោយរោងចក្រនេះ មានតម្រូវការកម្លាំងពលកម្មរហូតដល់ជាង ២ ០០០នាក់។

លោក វ៉ី សំណាង អភិបាលខេត្តកំពង់ស្ពឺ បានលើកឡើងក្នុងពិធីសម្ពោធដាក់ឱ្យដំណើរការរោងចក្រផលិតកាបូប និងខ្សែក្រវ៉ាត់នៅថ្ងៃទី ២២ ខែ កញ្ញានេះថា បច្ចុប្បន្នសេដ្ឋកិច្ចរបស់ខេត្តកំពង់ស្ពឺ ទទួលបានលទ្ធផលដ៏គួរឱ្យជាទីមោទនៈ ដែលឆ្លុះបញ្ចាំងឱ្យឃើញពីកំណើនសេដ្ឋកិច្ចយ៉ាងឆាប់រហ័ស និងបានរួមចំណែកកាត់បន្ថយភាពក្រីក្រផងដែរ។

លោកបន្តថា ទាំងអស់នេះ គឺផ្តើមចេញពីផ្លែផ្កានៃសន្តិភាព ដែលបានបង្កលក្ខណៈងាយស្រួល និងឱកាសដល់​អ្នកវិនិយោគ​ជាច្រើន មករកស៊ីក្នុងប្រទេសកម្ពុជា ជាពិសេសនៅក្នុងខេត្តកំពង់ស្ពឺ ដែលបានធ្វើឱ្យបងប្អូនប្រពលរដ្ឋ មានការងារធ្វើគ្រប់ៗគ្នា ហើយតាមរយៈការងារនេះដែរ គឺបានជួយជ្រោងសេដ្ឋកិច្ចគ្រួសារ និងសង្គមជាតិរីកចម្រើន។
លោកអភិបាលខេត្ត បានកោតសរសើរ ម្ចាស់រោងចក្រ សហគ្រាស ដែលបានសម្រេចចិត្តមក​ដាក់ទុន​វិនិយោគ ក្នុងខេត្តកំពង់ស្ពឺ ហើយបើគិតមកដល់បច្ចុប្បន្ន ទូទាំងខេត្តកំពង់ស្ពឺ មានរោងចក្រ សហគ្រាស វិស័យវាយនភ័ណ្ឌកាត់ដេរសម្លៀកបំពាក់ ផលិតស្បែកជើង កាបូប និងខ្សែក្រវាត់ចំនូនសរុប​ប្រមាណ​១៨៦កន្លែង និងមានកម្លាំងពលកម្មចំនួន ១៤៨ ៣៦៧នាក់ ក្នុងនោះស្រី ១១៥ ៤៧៥នាក់៕