លុយយ័ន ចិន ធ្លាក់ថ្លៃដល់កម្រិតទាបបំផុតមិនធ្លាប់មាន ចាប់តាំងពីឆ្នាំ​ ២០០៨

លុយយ័នចិនបានធ្លាក់ចុះដល់កម្រិតទាបបំផុតក្នុងរយៈពេល ១៥ ឆ្នាំ បើធៀបទៅនឹងលុយដុល្លារអាមេរិក ខណៈកាលពីថ្ងៃពុធរូបិយបណ្ណចិនមួយនេះធ្លាក់ចុះទៅដល់ ៧.២៣ ក្នុងមួយដុល្លារ ក្នុងទីផ្សារទីក្រុងសៀងហៃ ពោលជាការធ្លាក់ចុះដែលមិនធ្លាប់មានពីមុនមក ចាប់តាំងពីឆ្នាំ ២០០៨ ។

ស្របពេលនៃការធ្លាក់ចុះនៃលុយចិន ក្នុងនោះការរំពឹងទុកនៃការដំឡើងអត្រាការប្រាក់បន្ថែមទៀតរបស់អាមេរិកក៏កំពុងតែជំរុញឲ្យមានតម្រូវការប្រាក់ត្រលប់មកវិញនៅទូទាំងពិភពលោកផងដែរ ។

ជាមួយគ្នានោះ គម្លាតអត្រាការប្រាក់រវាងចិន​ និងអាមេរិក ក៏ជាកត្តាមួយទៀតជម្រុញឲ្យលុយចិនធ្លាក់ចុះដូចគ្នា​ ហើយធ្វើឲ្យធនាគារកណ្តាលចិនកំពុងតែប្រកាន់ខ្ជាប់នូវគោលនយោបាយបន្ធូរបន្ថយរូបិយវត្ថុរបស់ខ្លួន ។

ប្រភពទីផ្សារចិនបាននិយាយថា​ អ្នកវិនិយោគជាច្រើនមានការព្រួយបារម្ភអំពីទស្សនវិស័យសេដ្ឋកិច្ចប្រទេសចិន ដោយសារតែការធ្លាក់ចុះនេះ ជាពិសេសអាជ្ញាធរចិនមិនបានដាក់វិធានការប្រកបដោយប្រសិទ្ធភាពនោះឡើយ ដើម្បីទប់ស្កាត់លំហូរចេញនៃមូលនិធិរូបិយប័ណ្ណ ។

ទន្ទឹមនោះ អំឡុងពេលដែលប្រាក់យ័នកំពុងធ្លាក់ចុះខ្សោយខ្លាំង ប្រទេសដែលមានទំនាក់ទំនងសេដ្ឋកិច្ចយ៉ាងស៊ីជម្រៅជាមួយប្រទេសចិន ដូចជាកូរ៉េខាងត្បូង និងថៃ ក៏កំពុងតែជំរុញការលក់ចេញរូបិយប័ណ្ណរបស់ខ្លួនផងដែរ ៕

ប្រែសម្រួលដោយ ៖ នាង រតនៈ

ប្រភព ៖ NHK

ចុចអាន ៖ ឥណ្ឌា ថា មហិច្ឆតាសេដ្ឋកិច្ច ចិន អាចប្រឈមភាពឯកោនៅលើពិភពលោក