​​គយ ប្រមូលចំណូលបានជាង ២ពាន់លានដុល្លារ ​រយៈពេល ៩ខែឆ្នាំនេះ

​អគ្គនាយក​នៃ​អគ្គនាយកដ្ឋាន​គយ ​និង​រដ្ឋករ ប្រមូលចំណូលបានប្រមាណ ២០២២.០២ លានដុល្លារ ស្មើនឹង ៧៨.៦១% នៃច្បាប់ថវិកាជាតិ។​

លោក គុណ ញឹម ​អគ្គនាយក​នៃ​អគ្គនាយកដ្ឋាន​គយ ​និង​រដ្ឋាករ បានឱ្យដឹងថា ចំណូលនេះ គឺជាតួលេខមួយដ៏ល្អ និងរំពឹងថា ការអនុវត្តផែនការចំណូលនៅក្នុងឆ្នាំ ២០២២នេះ នឹងអាចគ្រប់ផែនការ ក្រោយពីបានឆ្លងផុតពេលវេលា​ដ៏លំបាក កាលពីឆ្នាំ ២០២០-២០២១ ដែលបង្កឡើងដោយវិបត្តិកូវីដ-១៩។

បើតាមលោក គុណ ញឹម ប្រភពចំណូលដ៏សំខាន់របស់អគ្គនាយកដ្ឋានគយ មួយផ្នែកធំ បានមកពីការយកពន្ធអាករ រថយន្តចង្កូតឆ្វេង ស្តាំ ជិត ​១ម៉ឺនគ្រឿង ដែលគិតជាថវិកាប្រមាណជិត ៨០លានដុល្លារ សម្រាប់ដំណាក់កាលទី១។ ចំណែកដំណាក់កាលទី ២ ប្រមូលពន្ធបានពីរថយន្តចង្កូតស្តាំជិត ៦ពាន់គ្រឿង ប្រភេទរថយន្តដឹក ស្មើនឹងថវិកាជិត២០​លានដុល្លារ សរុបទាំងពីរយុទ្ធនាការនេះ បានថវិកាជិត ១០០លានដុល្លារ។

លោក គុណ ញឹម បានគូសបញ្ជាក់ទៀតថា ក្រៅពីការប្រមូលចំណូលពន្ធពីរថយន្តនេះ គឺនៅមានការប្រមូលពន្ធពីមុខ​ទំនិញ​មួយ​ចំនួនទៀត ដូចជា គ្រឿងអេឡិចត្រូនិច ជាដើម ដែលជាប្រភពចំណូលដ៏សំខាន់របស់ថវិកាជាតិ។

ការថ្លែងរបស់លោក គុណ ញឹម ​អគ្គនាយក​នៃ​អគ្គនាយកដ្ឋាន​គយ ​និង​រដ្ឋករ ធ្វើឡើងនៅក្នុងសន្និសីទសារព័ត៌មាន ស្តីពី វឌ្ឍនភាពនៃការអនុវត្តការប្រមូលពន្ធលើយានយន្ត និងអាករនាំចូល ដែលមានស្រាប់ក្នុងប្រទេស នៅព្រឹកថ្ងៃទី ០៥ ខែ តុលា ឆ្នាំ ២០២២។

តាមរយៈកំណើននៃការប្រមូលពន្ធបានពីវិស័យផ្សេងៗនេះ អាចឆ្លុះបញ្ចាំងពីកំណើនសេដ្ឋកិច្ចរបស់កម្ពុជា មានការកើនឡើងវិញជាលំដាប់ ក្រោយការរាតនៃជំងឺកូវីដ-១៩ រយៈពេល ២ឆ្នាំ កន្លងទៅ។ ​

យោង​តាម​ក្រសួងសេដ្ឋកិច្ច​ ​និង​ហិរញ្ញវត្ថុសេដ្ឋកិច្ច​ ​បានព្យាករកំណើនសេដ្ឋកិច្ចកម្ពុជា ​កើន​ឡើង​ក្នុង​អត្រា​ ​៥​,​១​ ​ភាគរយ​នៅ​ឆ្នាំ ២០២២នេះ​ ​និង​ ​៦​,​២​ ​ភាគរយ​នៅ​ឆ្នាំ​ ​២​០​២​៣​៕