ថៃ ចង់ផលិតថាមពលខ្លួនឯងដើម្បីទប់ទល់ការឡើងថ្លៃអគ្គិសនី

យោងតាមសហព័ន្ធឧស្សាហកម្មថៃ (FTI) បានឲ្យដឹងថា  វិស័យឧស្សាហកម្មរបស់ប្រទេសថៃចង់ផលិតថាមពលអគ្គិសនីដោយខ្លួនឯង ដើម្បីឆ្លើយតបនឹងការឡើងថ្លៃនៃថាមពលអគ្គិសនីបច្ចុប្បន្ន ។

ការិយាល័យគណៈកម្មាការនិយតកម្មថាមពលបញ្ជាក់ពីខែសីហាថា ថាមពលអគ្គិសនីថៃ មានតម្លៃ ៤.៧២ បាត (០.១២ ដុល្លារ) នៅក្នុងមួយឯកតា ដែលតម្លៃនេះមានការកើន ០.៩៣ បាត (០.០២ ដុល្លារ) ចាប់ពីខែកញ្ញា ដល់ខែធ្នូ ឆ្នាំ ២០២២ ។

ទន្ទឹមនោះ ការស្ទង់មតិជាមួយសមាជិកសហព័ន្ធឧស្សាហកម្មជាង ២២០ សហគ្រាសសម្រាប់គំនិតនេះ មានសហគ្រាសជាច្រើនយល់ស្របក្នុងការបង្កើតថាមពលអគ្គិសនីដោយខ្លួនឯង ជាពិសេសតាមរយៈការបង្កើតថាមពលពីផ្ទាំងសូឡា ។

ជាមួយការបង្កើតនេះ សហគ្រាសជាច្រើនក៏ស្នើរឲ្យមានការធានាជាពិសេសពីសំណាក់រដ្ឋាភិបាលថៃ ក្នុងការលក់ថាមពលជូនរដ្ឋ ក៏ដូចជាការលើកទឹកចិត្តមួយផ្នែកដល់សហគ្រាសឯកជនក្នុងការខិតខំបង្កើតថាមពលអគ្គិសនីឲ្យមានភាពប្រសើរ និងជាការកាត់បន្ថយឧស្ម័នផ្ទះកញ្ចក់ផងដែរ ។

តាមរយៈការបង្កើតថាមពលអគ្គិសនីដោយខ្លួនឯងនេះដែរ  សហព័ន្ធបង្ហាញថា នឹងជួយបង្កើនថាមពលដល់ ១០ ភាគរយថែមទៀតនៅក្នុងឆ្នាំ ២០២៣ ៕

ប្រែសម្រួលដោយ ៖ នាង រតនៈ

ប្រភព ៖ Thaiger

ចុចអាន ៖ លោក ប្រាយុទ្ធ ត្រឡប់ចូលបំពេញការងារវិញហើយ