​​​ឧកញ៉ា តែ តាំងប៉ ៖ វិស័យ SME នៅតែជួបបញ្ហា​ទីផ្សារ ដោយសារខ្វះការគាំទ្រផលិតផល​ក្នុងស្រុក

វិស័យសហគ្រាសធុនតូច និងមធ្យម (SME) នៅតែជួបប្រទះបញ្ហាទីផ្សារ ដោយសារការហូរចូលផលិតផល​បរទេសយ៉ាងសន្ធឹក និងខ្វះការគាំទ្រផលិតផលក្នុងស្រុក។

លោកឧកញ៉ា តែ តាំងប៉ ប្រធាន​សម្ព័ន្ធ​សមាគម​សហគ្រាស​ធុនតូច និង​មធ្យម​កម្ពុជា បានលើកឡើងថា ការមិននាំគ្នាគាំទ្រផលិតផលក្នុងស្រុក ធ្វើឱ្យវិស័យ SME ជាប់គាំង ដោយសារផលិតបានហើយតែខ្វះទីផ្សារ។

លោកឧកញ៉ា បានគូសបញ្ជាក់ថា កម្ពុជា មានគោលនយោបាយយុទ្ធសាស្រ្តចតុកោណ តែការអនុវត្តនៅ​មានភាពធូររលុង ស្ថាប័នពាក់ព័ន្ធ មិនសូវយកចិត្តទុកដាក់លើការផលិតនៅក្នុងស្រុក បែរជាទៅគាំទ្រឱ្យមាន​ការនាំចូលផលិតផលពីរបទេស ដែលធ្វើឱ្យវិស័យ SME រងផលប៉ះពាល់ខ្លាំង។

លោកថ្លែងដូច្នេះថា« បើនាំទំនិញគេចូល ផលិតផលក្នុងស្រុកយើងលក់យ៉ាងម៉េចដាច់ យើងត្រូវនាំគ្នាជំរុញគោល​នយោបាយកែច្នៃផលិតផលកសិកម្ម ធ្វើយ៉ាងណាឱ្យ SME អាចកែច្នៃលក់បាន និងមានទីផ្សារលក់ត្រឹមត្រូវ ពួកគាត់នឹងអាចរស់បាន»។

បើតាមលោកឧកញ៉ា តែ តាំងប៉ សព្វថ្ងៃនៅកម្ពុជា ផលិតអ្វីក៏បានដែរ តែសំខាន់ខ្វះការគាំទ្រ។ កម្ពុជា ជាប្រទេស​កសិកម្ម មិនចាញ់វៀតណាម និងថៃឡើយ។ នៅកម្ពុជា មានសហគ្រាសធុនតូច និងមធ្យមប្រមាណ ៩៩.៥ភាគរយ។ ដើម្បីឱ្យវិស័យនេះ ដំណើរការបានល្អប្រសើរ រាជរដ្ឋាភិបាល ត្រូវជួយរកទីផ្សារ បន្ធូរបន្ថយពន្ធ បណ្តុះបណ្តាលជំនាញ​បច្ចេកទេសគ្រប់បែបយ៉ាង ដល់អ្នកស្ថិតក្នុងវិស័យនេះ។

ទោះយ៉ាងណា រាជរដ្ឋាភិបាល បានជួយមួយផ្នែកហើយ តែយើងទាំងអស់គ្នា ក៏ត្រូវរួមចំណែកជួយគ្នាផងដែរ ព្រោះវិស័យ SME យើងនៅខ្សោយនៅឡើយ ពោលគឺខ្សោយទាំងធនធាន ខ្សោយទាំងបច្ចេកទេស និងទីផ្សារ។ នេះជាការបន្ថែមរបស់លោកឧកញ៉ា តែ តាំងប៉។

ប្រធាន​សម្ព័ន្ធ​សមាគម​សហគ្រាស​ធុនតូច និង​មធ្យម​កម្ពុជា បានថ្លែងទៀតថា « យើងត្រូវយកយុទ្ធសាស្រ្តចតុកោណ​ដំណាក់កាលទី១ និងទី៤ របស់រាជរដ្ឋាភិបាលដាក់ចេញ គឺកាត់បន្ថយការនាំចូល ជំរុញការកែច្នៃផលិតផល​ដែលចេញ​ពីកសិកម្មឱ្យទៅជាចំណីអាហារ និងត្រូវនាំគ្នាស្វះស្វែងរកទីផ្សារ ដើម្បីជួយវិស័យនេះ»។

លោកឧកញ៉ា តែ តាំងប៉ សង្កត់ធ្ងន់ថា ក្នុងមួយឆ្នាំៗ កម្ពុជា នាំចូលប្រមាណ ៨ពាន់លានដុល្លារ ពីប្រទេសជិតខាង។ លោកថា ប្រសិនបើយើងផលិតបានផលិតផលរបស់យើងតែពាក់កណ្តាលនៃការនាំចូលនេះ ក៏វិស័យ SME រស់បាន​ដែរ។

សហគ្រាសធុនតូច និងមធ្យម(SME) នៅកម្ពុជា មានប្រមាណជាង ៥៣ម៉ឺនសហគ្រាស កំពុងដំណើរការអាជីវកម្ម គិតត្រឹមឆ្នាំ ២០២១។ គិតត្រឹមខែកក្កដា ឆ្នាំ ២០២២ ក្រសួងឧស្សា​ហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចុះបញ្ជីដល់សហគ្រាស​ធុនតូច ​និងមធ្យម (SME) ជាង ៤ម៉ឺនមូលដ្ឋាន នៅទូទាំងប្រទេស ដោយបានបង្កើតការ​ងារជាង ៤សែននាក់។

យោងតាមធនាគារអភិវឌ្ឍអាស៊ី ADB បានឲ្យដឹងថា សហគ្រាសធុនតូច និងមធ្យម ត្រូវបានប៉ាន់ស្មានថា មានប្រមាណ ៩៩%នៃសហគ្រាសសរុប បានរួមចំណែកប្រមាណ ៦០ភាគរយនៃផលិតផលក្នុងស្រុក និងបង្កើតការងារជិត ៧០​ភាគរយ​នៃកម្លាំងពលកម្ម៕