​ទិន្នផល​ស្វាយចន្ទី​បង្ហាញសញ្ញាល្អ​ ខណៈតម្លៃស្ថិតក្នុងភាពស្រពេចស្រពិល

អំណោយផលលើដំណាំស្វាយចន្ទីរ​មានភាពល្អប្រសើរ ភាគច្រើននៅឆ្នាំនេះ ដោយសារការចេញ​ផ្កាល្អ និងគ្មានសត្វល្អិត។

លោក អិល ឈិញ ​អនុប្រធានសមាគមស្វាយចន្ទីខេត្តឧត្តរមានជ័យ​បានឲ្យ​ដឹង​ថា ស្វាយចន្ទីឆ្នាំនេះមានអំណោយផលល្អភាគច្រើន​ចេញ​ផ្កាល្អមិនទាន់មានផលប៉ះពាល់​ពីសត្វល្អិតនោះទេ។

លោកប្រាប់ថា នៅឆ្នាំនេះ​អំណោយ​ផលទាំងអាកាសធាតុ និងសត្វល្អិតមិនមាននោះទេ ខណៈកសិករប្រើថ្នាំ​តិចជាងឆ្នាំមុនធ្វើឲ្យការចំណាយក៏តិចជាងមុនដែរ។

ការប្រមូលផលស្វាយចន្ទីនឹងត្រូវចាប់ផ្ដើមនៅអំឡុងដំណាច់ខែមករា និងខែកុម្ភៈ ឆ្នាំ ២០២៣ ខណៈតម្លៃមិន​ទាន់ដឹងប្រាកដថាឡើង ឬចុះនៅឡើយ។ នៅឆ្នាំមុនស្វាយចន្ទីស្រស់លក់បាន ៥ ៨០០ រៀល ក្នុង១ គីឡូ ហើយធ្លាក់ចុះដល់ ៣ ៥០០ រៀល រួចបានឡើងទៅវិញដល់ ៤ ០០០ រៀល។​

លោក អិល ឈិញបញ្ជាក់ថា ក្រុមកសិករដាំស្វាយចន្ទី​ជួបក្រុមហ៊ុន​ដែលប្រមូលទិញកាលពីដើមខែវិច្ឆិកានេះហើយថា ក្រុមហ៊ុនជំរុញ​ឲ្យ​កសិ​ករ​ធ្វើគ្រាប់ស្វាយចន្ទីស្ងួត​ដើម្បីលក់។

ទិន្នន័យរបស់ក្រសួងកសិកម្ម រុក្ខាប្រមាញ់ និងនេសាទបង្ហាញថា នៅក្នុងរយៈពេល ១០ ខែ ឆ្នាំ ២០២២ កម្ពុជាបាននាំចេញ​គ្រាប់ស្វាយចន្ទីឆៅ ៤៧ម៉ឺនតោន ទៅកាន់ទីផ្សារអន្តរជាតិចំនួនេះគឺធ្លាក់ចុះ​ ៥០% បើធៀបនឹងរយៈពេលដូចគ្នានៅឆ្នាំ២០២១៕

អត្ថបទ៖ ឡេង ដេត