អ្នកសេដ្ឋកិច្ច​ជំរុញឲ្យមានការកែច្នៃ​ផលិតផលកសិកម្ម​បញ្ចៀសការកកស្ទះ

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៅរាជ្យបណ្ឌិតសភាកម្ពុជា មានប្រសាសន៍នៅថ្ងៃទី ២៩ ខែវិច្ឆិកា ឆ្នាំ ២០២២ លោកជំរុញឲ្យសហគម ឬសមាគមសហគ្រាសធនតូច និងមធ្យមចាប់ផ្ដើមកែច្នៃផលិតផលកសិកម្មបញ្ចៀសការកកស្ទះ។

អ្នកជំនាញសេដ្ឋកិច្ចដដែលរូបប្រាប់ថា កសិកម្មធ្វើបានហើយចាក់ចោលដល់រដូវស្វាយទុំជ្រុះចោលមកពីអត់មានការកែច្នៃ ខណៈដែលយើងពឹងទៅលើការលក់វត្ថុធាតុដើមចេញដូចជាដាំផ្លែស្វាយលក់ស្វាយចេញ អ្នកកែច្នៃមានច្រើនដែរ តែកែច្នៃមិនបានមកពីកត្តាបច្ចេកទេសមិនត្រូវស្ដង់ដា និងការលើកលែងពន្ធរបស់សហគ្រាសធនតូច និងមធ្យម។

បើតាមលោកលោកបណ្ឌិត គី សេរីវឌ្ឍន៍ រដ្ឋាភិបាលបានប្រកាសគោលនយោបាយដល់អ្នកដែលចាប់ផ្ដើមកែច្នៃ និងលើកទឹកចិត្តដល់ SME ក៏ប៉ុន្តែពួកគាត់មិនបានដឹងថាទៅស្នើសុំយ៉ាងម៉េច ខណៈតាមពន្ធដារខេត្តមួយចំនួនមិនប្រាប់សហគ្រាសធនតូច និងមធ្យម ពីការបង់ពន្ធ។

អ្នកជំនាញសេដ្ឋកិច្ចបន្តថា «បញ្ហាទីផ្សារគឺថ្លៃលក់មិនបានបានស្មើនឹងថ្លៃបេះ លក់បានថោកជាងបេះ សួរថាបេះ ធ្វើអ្វី មិនកាន់តែខាតទៀត។ កសិករចិញ្ចឹមជ្រូកនៅស្វាយរៀងដល់កូនជ្រូកកើតទុកឲ្យងាប់ចោល ព្រោះជ្រូកវាថោក កាលណាឲ្យវាស៊ីអស់ច្រើនខាត អញ្ចឹងទុកឲ្យវាងាប់ចោល ដែលរឿងទាំងនេះសុទ្ធជារឿងពិតដែលបានកើតឡើងនៅឆ្នាំ ២០១៨ ហើយបន្តមកដល់ឥឡូវ»។

លោកបណ្ឌិត គី សេរីវឌ្ឍន៍បញ្ជាក់ថា ដើម្បីធានាការផលិតលើស ព្រោះកសិករមិនមានលទ្ធភាពនោះទេ រាប់ទាំងពីការកែច្នៃ ឃ្លាំងផ្ទុក ដូច្នេះមានតែសហគម សមាគម SME ដែលអាចធ្វើកិច្ចការនេះបាន​សម្រាប់ស្រោចស្រង់អញ្ចឹងបង្កើតឲ្យមានការតភ្ជាប់រវាងកសិករជាមួយអ្នកផលិតអ្នកកែច្នៃ ដើម្បីឲ្យកសិករ និងអ្នកកែច្នៃ​អាចធ្វើការជាមួយគ្នាបាន​គាត់រុញមកកែច្នៃទើបធានារដល់ការកកស្ទះមិនថា ស្រូវ ស្វាយ ឬផលិតផលកសិកម្មផ្សេងទៀតជាដើម៕

អត្ថបទ៖ ឡេង ដេត