គម្រោង​អភិវឌ្ឍ​ផ្សារ​សំរោងយ៉ោងកំពុង​ពន្លឿន​ទៅមុខ ក្រោយរង​អគ្គិភ័យ​ឆាបឆេះ​

កាលពី​ចុង​សប្តាហ៍ឯកឧត្តមបណ្ឌិត ជា វ៉ាន់ដេត រដ្ឋមន្រ្តី​ក្រសួងប្រៃសណីយនិង​ទូរគមនាគមន៍ និង​ជា​​តំណាងរាស្រ្តមណ្ឌលខេត្តតាកែវ ​បានចុះជួបសំណេះសំណាលជាមួយប្រជាពលរដ្ឋជាអាជីវករនៅ​ផ្សារសំរោងយ៉ោង ឃុំត្រពាំងសាប ស្រុកបាទី ខេត្តតាកែវ ដើម្បីដោះស្រាយបញ្ហាមួយចំនួន ក្រោយ​ផ្សារ​រងការបំផ្លាញដោយអគ្គិភ័យកាលពីយប់ថ្ងៃទី១៧ ខែកញ្ញា ឆ្នាំ២០២០។

ក្នុងដំណើរចុះ​ទៅ​ពិនិត្យ​មើល​នោះ ក៏​មាន​ការ​ចូលរួមពីឯកឧត្តម អ៊ូច ភា អភិបាលខេត្តតាកែវ អភិបាលរងខេត្ត លោក ភួន ឈីម អភិបាលស្រុកបាទី និងប្រតិភូអមដំណើរផ្សេងទៀត។

ការងារ​មួយ​ចំនួន​កំពុង​ត្រូវ​បាន​ធ្វើ​លើ​ការ​អភិវឌ្ឍផ្សារ​នេះ​ឡើង​វិញមាន​ដូចជា៖

១. ពន្លឿនការសាងសង់ដំបូលផ្សារ និងសំណង់ផ្សារទាំងមូលឱ្យបានរួចរាល់ក្នុងពេលឆាប់ៗនេះ

២. កសាងផ្លូវបេតុងជុំវិញផ្សារមានទំហំ ៨ ម៉ែត្រ, ផ្លូវមេខ្វែងក្នុងផ្សារទំហំ ៨ម៉ែត្រ ចំនួន ១ខ្សែ និងទំហំ ៦ម៉ែត្រ ចំនួន ១ ខ្សែ រួមទាំងផ្លូវតូចៗនៅក្នុងផ្សារទំហំ ៣ ម៉ែត្រ ចំនួន ១៨ខ្សែ

៣.រៀបចំបណ្តាញលូក្នុងផ្សារ ដោយសារលូសព្វថ្ងៃខូចខាតអស់ពុំអាចប្រើប្រាស់បាន

៤.រៀបចំតបណ្តាញអគ្គីសនីមេមួយនៅក្នុងផ្សារ

៥. រៀបចំតប្រព័ន្ធទឹកស្អាតនៅក្នុងផ្សារដែលជាប្រព័ន្ធមេ៦.សាងសង់បង្គន់អនាម័យនៅក្នុងផ្សារ ប្រសិនបើមានដីណាអាចសាងសង់៕