១០ ខែ ឆ្នាំ ២២ កម្ពុជារកចំណូលពីការនាំចេញកសិផល​ជាង ៣ពាន់លានដុល្លារ

រយៈពេល ១០ ខែ ឆ្នាំ ២០២២ កម្ពុជា រកចំណូលបានពីការនាំចេញកសិផលប្រមាណ ៣ ០៦៩ ពាន់លានដុល្លារ ដោយក្នុងនោះ ការនាំចេញអង្ករមានចំនួន ៤៣៥លានដុល្លារ ការនាំចេញស្រូវចំនួន ៤៩២លានដុល្លារ ការនាំចេញ​ផលិផល​ក្រៅពីស្រូវអង្ករមានចំនួនជាង ២ពាន់លានដុល្លារ។ នេះយោងតាមរបាយការណ៍របស់ក្រសួងកសិកម្ម នៅថ្ងៃទី ១៦ ខែធ្នូនេះ។

បើតាមរបាយការណ៍បរិមាណនៃការនាំចេញអង្ករ ១០ខែ មានចំនួនជាង ៥០ម៉ឺនតោន កើនឡើងជិត ៥ម៉ឺនតោន  ស្មើ ១០,៦៧ភាគរយ បើធៀបនឹងការនំាចេញរយៈពេលដូចគ្នាកាលពីឆ្នាំ ២០២១។

ចំណែកការនាំចេញស្រូវ ១០ខែឆ្នាំនេះ មានចំនួនជាង ២លានតោន ថយចុះប្រមាណ ២១ម៉ឺនតោន បើធៀបនឹង​រយៈពេល​ដូចគ្នាកាលពីឆ្នាំ ២០២១។

សូមរំលឹកថា រយៈពេល ១០ខែ កាលពីឆ្នាំ ២០២១ កម្ពុជា នាំចេញកសិផលបានប្រមាណ ៦លានតោនទៅកាន់ទីផ្សារ​គោលដៅចំនួន ៦៨ប្រទេស ដោយទទួលបានចំណូលជាង ៤ពាន់លានដុល្លារ៕