រុស្ស៊ី ​ព្រមាន​កាត់​បន្ថយ​ផលិតកម្ម​ ប្រេង

ឧបនាយករដ្ឋមន្ដ្រី Aleksandr Novak បានព្រមានកាលពីថ្ងៃសុក្រទី២៣ខែធ្នូថា ប្រទេសរុស្ស៊ីនឹងមិនលក់ប្រេងទៅឲ្យប្រទេសណា ដែលកំណត់តម្លៃកំណត់លើការនាំចេញប្រេងឆៅរបស់ខ្លួននោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមលោក Novak, ទីក្រុងមូស្គូអាចឆ្លើយតប ដោយការកាត់បន្ថយផលិតកម្មប្រេងពី ៥០០ ០០០ ទៅ ៧០០ ០០០ បារ៉ែលក្នុងមួយថ្ងៃនៅដើមឆ្នាំ២០២៣។

រុស្ស៊ីគឺជាប្រទេសផលិតប្រេងធំលំដាប់ទីបីរបស់ពិភពលោក ហើយការកាត់បន្ថយនេះ គឺស្មើនឹងប្រហែល ៥ ទៅ ៦% នៃទិន្នផលប្រចាំថ្ងៃរបស់ប្រទេស។

ការកំណត់តម្លៃប្រេងឆៅរបស់រុស្ស៊ី ៦០ដុល្លារក្នុងមួយបារ៉ែល ដោយ G7 និង EU បានចូលជាធរមានកាលពីថ្ងៃទី៥ខែធ្នូ។ វិធានការនេះ គឺសំដៅទប់ស្កាត់ប្រាក់ចំណូលរបស់វិមានក្រឹមឡាំង។

លោក Novak បានព្រមាននៅក្នុងបទសម្ភាសន៍ជាមួយប៉ុស្តិ៍ទូរទស្សន៍ Rossiya-24 ថា “យើងត្រៀមខ្លួនរួចជាស្រេច ដើម្បីកាត់បន្ថយការផលិតរបស់យើងមួយផ្នែកនៅដើមឆ្នាំក្រោយ។ យើងនឹងព្យាយាមស្វែងរកចំណុចរួមមួយចំនួនជាមួយសមភាគីរបស់យើង ដើម្បីការពារហានិភ័យបែបនេះ។ ប៉ុន្តែបច្ចុប្បន្ន យើង​ចង់​ប្រថុយ​នឹង​ការ​កាត់បន្ថយ​ផលិតកម្ម ជាជាង​ប្រកាន់ខ្ជាប់​នឹង​គោលការណ៍​លក់​ស្របតាម​កម្រិត​កំណត់”។

មន្ត្រីរូបនេះ បានពណ៌នាការធ្លាក់ចុះផលិតកម្មសក្តានុពលថា ជារឿងមិនសំខាន់ចំពោះប្រទេសរុស្ស៊ី។ លោកបញ្ជាក់ឡើងវិញថា ទីក្រុងមូស្គូ នឹងមិនលក់ប្រេងឆៅរបស់ខ្លួនទៅឲ្យអ្នកណា ដែលអនុវត្តការកំណត់តម្លៃឡើយ។ ក្រុមហ៊ុនផលិតរុស្ស៊ី អាចប្តូរទិសដៅការនាំចេញរបស់ពួកគេទៅកាន់ទីផ្សារប្រកួតប្រជែង រួមទាំងអាស៊ីផងដែរ ដោយសារថាមពលរបស់ប្រទេសនេះ នៅតែមានតម្រូវការខ្ពស់ទូទាំងពិភពលោក។

យោងតាមលោក Novak, ផលិតកម្មប្រេងពេញមួយឆ្នាំរបស់រុស្ស៊ីនៅឆ្នាំ២០២២ នឹងកើនឡើងដល់៥៣៥លានតោន ស្មើនឹងប្រហែល១០.៧៤លានបារ៉ែលក្នុងមួយថ្ងៃ។ ទិន្នន័យបង្ហាញថា ក្នុងខែវិច្ឆិកា ទិន្នផលប្រចាំថ្ងៃជាមធ្យមរបស់ប្រទេស បានឡើងដល់កម្រិតខ្ពស់រយៈពេលប្រាំបីខែគឺ ១០.៩០ លានបារ៉ែលក្នុងមួយថ្ងៃ៕

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី ក្តៅស្លឹកត្រចៀក ចំពោះដំណើរទស្សនកិច្ចរបស់លោក Zelensky ទៅ វ៉ាស៊ីនតោន