ពាណិជ្ជកម្មទ្វេភាគីកម្ពុជា-តួកគី សម្រចបានជាង​ ១៣០លានដុល្លារ ១១ខែ ឆ្នាំ ២០២២

ទំហំពាណិជ្ជកម្មទ្វេភាគីកម្ពុជា តួកគី ក្នុងរយៈពេល ១១ខែ នៃឆ្នាំ២០២២ សម្រេចបានរហូតដល់ ១៣៦,១៤៩ លាន​ដុល្លារអាមេរិក ដែលកើនឡើង ៦៣.៦% បើធៀបនឹងរយៈពេល ដូចគ្នាក្នុងឆ្នាំ ២០២១។ ដោយឡែក ក្នុងរយៈពេល៥ឆ្នាំ​(២០១៧-២០២១)​ សម្រេចបាន ៤៦២,៦៣ លានដុល្លារអាមេរិក ។ ក្នុងនោះ កម្ពុជានាំចេញ​មុខទំនិញ ទៅតួកគី ដូចជា សម្លៀកបំពាក់ វាយនភណ្ឌ ស្បែកជើង សម្ភារៈធ្វើដំណើរ អង្ករ ជាដើម។ ដោយឡែកការនាំ​ចូលទំនិញពីតួកគី មាន​ដូចជា៖ ម៉ាស៊ីន កប្បាស ផលិតផលឱសថ កញ្ចក់ ដែក ផលិតផលប្លាស្ទិក និងទំនិញដទៃ​ទៀត។ នេះបើតាមទិន្នន័យ​របស់ក្រសួងពាណិជ្ជកម្ម។

កាលពីថ្ងៃទី ០៥ ខែ មករា លោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម អញ្ជើញដឹកនាំកិច្ចប្រជុំអន្តរក្រសួង​ត្រៀមរៀបចំកិច្ចប្រជុំលើកទី៣ គណៈកម្មការសេដ្ឋកិច្ចចម្រុះកម្ពុជា-តួកគី នៅកម្ពុជា។ កិច្ចប្រជុំនេះ មានគោលបំណង​ពិភាក្សាលើកំណត់ហេតុរួមនៃកិច្ចប្រជុំ ដើម្បីត្រៀមរៀបចំកិច្ចប្រជុំលើកទី៣ គណៈកម្មការសេដ្ឋកិច្ចចម្រុះ​កម្ពុជា-តួកគី​ដែលគ្រោងនឹងធ្វើឡើងនៅថ្ងៃទី១០-១១ ខែមករា ឆ្នាំ២០២៣ នៅរាជធានីភ្នំពេញ។ កិច្ចប្រជុំអន្តរក្រសួងនេះ មានការ​ចូល​រួមពី ឯកឧត្តម លោកលោកស្រី ថ្នាក់ដឹកនាំ-មន្រ្តីជំនាញនៃក្រសួងពាណិជ្ជកម្ម និងអន្តរក្រសួង-​ស្ថាប័នពាក់ព័ន្ធ​ចំនួន​១៤ស្ថាប័ន។

ជាលទ្ធផល អង្គប្រជុំបានពិភាក្សា និងផ្លាស់ប្តូរយោបល់លើសេចក្តីព្រាងកំណត់ហេតុរួម ដែលគ្របដណ្ដប់​លើវិស័យ​អាទិភាព​​រួមមាន៖ ពាណិជ្ជកម្ម វិនិយោគ ធុរកិច្ច ឧស្សាហកម្ម វិទ្យាសាស្រ្ត បច្ចេកវិទ្យានិងនវានុវត្តន៍ ហាឡាល សហគ្រាសធុនតូចនិងមធ្យម កសិកម្ម ដឹកជញ្ជូន អាកាសចរ ស៊ីវិល សុខាភិបាល អប់រំ ទេសចរណ៍ និងវិស័យពាក់​ព័ន្ធដទៃទៀត ក្នុងន័យជំរុញនិងទាញអត្ថប្រយោជន៍ឱ្យបានជាអតិបរមាពីកិច្ចសហប្រតិបត្តិការទ្វេភាគីកម្ពុជា-តួកគី ស្របតាមគោលនយោបាយស្ដារនិងអភិវឌ្ឍន៍សេដ្ឋកិច្ច ឡើងវិញ បន្ទាប់ពីរងវិបត្តិសកលកូវីដ-១៩៕