មកដឹងទំហំពាណិជ្ជកម្ម ឡាវ-វៀតណាម ជាពិសេសការនាំចូលប្រេង​

យោងតាមបណ្ដាញសហគមន៍សេដ្ឋកិច្ចអាស៊ាន (AEC) បានឲ្យដឹងថា កាលពីឆ្នាំ ២០២២ ការនាំចូលប្រេងរបស់ប្រទេសឡាវពីសំណាក់វៀតណាម កើនឡើងប្រមាណ ៤៣៩ ភាគរយ និងមានតម្លៃ ១២៥ លានដុល្លារ ។

ក្រៅពីប្រេង ការនាំចេញសរុបពីប្រទេសវៀតណាមទៅកាន់ប្រទេសឡាវក៏បានកើនឡើងផងដែរចំនួន ១០.៤ ភាគរយឈានដល់ ៦៥៦.៤ លានដុល្លារ ខណៈដែលការនាំចេញផ្សេងទៀតរួមទាំងដែកថែបបានធ្លាក់ចុះ ១៥ ភាគរយមកនៅត្រឹមតែ ៦០.១ លានដុល្លារប៉ុណ្ណោះ ប៉ុន្តែចំពោះ ជីវិញកើនឡើង ៣១ ភាគរយស្មើនឹង ៣២.៥ លានដុល្លារ ។

ផ្ទុយទៅវិញ ការនាំចូលទំនិញពីឡាវទៅកាន់ប្រទេសវៀតណាម កើនឡើងត្រឹម ៣៤.៦ ភាគរយស្មើនឹង ១ ពាន់លានដុល្លារ ដែលមានផលិតផលចម្បង គឺផលិតផលឈើ ឬឈើកែច្នៃនិងកៅស៊ូក្រាលថ្នល់ជាដើម ។

ដោយស្ថិតនៅក្រោមកិច្ចព្រមព្រៀងពាណិជ្ជកម្មទំនិញអាស៊ាន ឬកិច្ចព្រមព្រៀងពាណិជ្ជកម្មទ្វេភាគីឡាវ និងកិច្ចព្រមព្រៀងពាណិជ្ជកម្មព្រំដែនវៀតណាម-ឡាវ, ទំនិញភាគច្រើនដែលត្រូវបានជួញដូររវាងប្រទេសទាំងពីរ គឺគ្មានពន្ធនោះទេ ។

ទន្ទឹមនឹងនោះ រយៈពេល ៣ ឆ្នាំកន្លងមកនេះ ឡាវបានក្លាយទៅជាគោលដៅដ៏ពេញនិយមសម្រាប់ការវិនិយោគលើវិស័យកសិកម្មប្រកបដោយគុណភាពខ្ពស់ដោយអាជីវកម្មនៅវៀតណាម ។

បន្ថែមពីនេះ ប្រាក់ចំណូលពាណិជ្ជកម្មទ្វេភាគីរវាងប្រទេសទាំងពីរក៏បានកើនឡើងចំនួន ២៤ ភាគរយផងដែរក្នុងឆ្នាំ ២០២២ ដែលឈានដល់ជាង ១.៧ ពាន់លានដុល្លារ ។

ជាពិសេស កាលពីដើមសប្តាហ៍នេះ មជ្ឈមណ្ឌលស៊ើបការណ៍សម្ងាត់សេដ្ឋកិច្ចរបស់ធនាគារ Siam Commercial Bank ក៏បានព្យាករណ៍ដែរថា ប្រទេសឡាវ កម្ពុជា វៀតណាម និងមីយ៉ាន់ម៉ា នឹងមើលឃើញកំណើនសេដ្ឋកិច្ចដ៏មានសក្តានុពលនៅឆ្នាំ ២០២៣ នេះ ៕

ប្រែសម្រួលដោយ ៖ នាង រតនៈ

ប្រភព ៖​ Laotian Times

ចុចអាន ៖ វៀតណាម ចាយលុយជាង ១ ពាន់លានដុល្លារ ទិញគ្រាប់ស្វាយចន្ទីឆៅពី កម្ពុជា