កំពង់ផែស្វយ័តក្រុងព្រះសីហនុ រកចំណូលបានជាង ៨៦លានដុល្លារ ក្នុងឆ្នាំ ២០២២

កំពង់ផែស្វយ័តក្រុងព្រះសីហនុ​ រកចំណូល​សរុបបាន​ប្រមាណ ៣៥១ ប៊ីលានរៀល ស្មើនឹងជាង ៨៦លានដុល្លារអាមេរិក កើនឡើង ២,៤៥% បើធៀបនឹងឆ្នាំ២០២១។ ដោយមាន​ទំនិញ​ឆ្លងកាត់ប្រមាណ ៥,៣ លានតោន មានការកើនឡើង ១,២៩%។

ថ្លែងក្នុងសន្និបាតបូកសរុបលទ្ធផលការងារប្រចាំឆ្នាំ២០២២ និងលើក​ទិសដៅការងារឆ្នាំ២០២៣ នៃក្រសួង​សាធារ​ណការ និងដឹកជញ្ជូន នាព្រឹកថ្ងៃទី១៥ ខែកុម្ភៈ ឆ្នាំ២០២៣ លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានឱ្យដឹងថា បច្ចុប្បន្នកំពង់ផែស្វយ័តក្រុងព្រះសីហនុ បាននិងកំពុងអភិវឌ្ឍ​ និងធ្វើទំនើប​កម្មចំណត​ផែកុងតឺន័រថ្មី ​តាមរយៈការសិក្សាជាមួយ JICA ដើម្បីប្រែក្លាយជាកំពង់ផែក្នុងតំបន់ដ៏មានសក្តានុពល គាំទ្រដល់​កំណើនសេដ្ឋកិច្ចជាតិ និងកាត់បន្ថយភាពក្រីក្រ ដែលបច្ចុប្បន្ន គឺស្ថិតក្នុងនីតិវិធីដេញថ្លៃជ្រើសរើស​ក្រុមហ៊ុន​សាងសង់។

បច្ចុប្បន្ននេះកំពង់ផែស្វយ័តក្រុងព្រះសីហនុ បាននិងកំពុងសិក្សាសមិទ្ធិលទ្ធភាពសាងសង់​ផែ​កុងតឺន័រ​ជំហានទី២ និងជំហានទី៣ ក្នុងនោះ ជំហានទី២ មានប្រវែង៤០០ម៉ែត្រ មានជម្រៅទឹក ១៦ម៉ែត្រ ​ដែលជាគម្រោង​ឆ្នាំ២០២៥​-២០២៨ និង ជំហានទី៣ មាន​ប្រវែង ៤៣០ម៉ែត្រ មានជម្រៅទឹក ១៧,៥ម៉ែត្រ ដែលជា​គម្រោង​ឆ្នាំ២០២៦-២០៣០។

កំពង់ផែស្វយ័តក្រុងព្រះសីហនុ គឺជាកំពង់ផែសមុទ្រទឹកជ្រៅដ៏សំខាន់នៃព្រះរាជាណាចក្រកម្ពុជា ដែលមាន​ផ្ទៃដីប្រតិ​បត្តិការ​ប្រមាណ១២៥ហិកតា ។ កំពង់ផែស្ថិតនៅឈូងសមុទ្រកំពង់សោមដែលជាកំពង់ផែទឹក​ជ្រៅតែមួយគត់សម្រួល​ដល់ការដឹកជញ្ជូនតាមសមុទ្រដែលទទួលបានភាពអនុគ្រោះពីធម្មជាតិ ដូចជាមានជម្រៅទឹកជ្រៅ មានកោះជារបាំងខ្យល់ និងរលកធំៗ ហើយស្ថិតនៅចំទីតាំងដែលពុំតម្រូវឱ្យមានការបូមស្តារឃ្លងនាវាជាប្រចាំឡើយ៕