ទំហំពាណិជ្ជកម្មកម្ពុជា និងឥណ្ឌា កើនឡើងជិត​៣០០លានដុល្លារ

ទំហំពាណិជ្ជកម្មរវាងកម្ពុជា និងឥណ្ឌាបានកើនឡើងដល់ជិត ៣០០លានដុល្លារអាមេរិក នៅឆ្នាំ ២០២២ ក្នុងនោះ ការនាំចូលផលលិតផលពីឥណ្ឌាមកកម្ពុជា មានរហូតដល់ទៅជាង១៩០លានដុល្លារអាមេរិក។

ថ្លែងប្រាប់អ្នកសារព័ត៌មានក្រោយពិធីសម្ពោធជាផ្លូវការមជ្ឍមណ្ឌលព័ត៌មានវិទ្យានៅក្នុងពុទ្ធិកសកលវិទ្យាល័យព្រះសីហនុរាជ កាលពីល្ងាចថ្ងៃទី២១កម្ភៈឆ្នាំ២០២៣ លោកស្រី បណ្ឌិត ដេវីយ៉ានីខូប្រាហ្គាដ(DevyaniKhobragade) ឯកអគ្គអគ្គរដ្ឋទួតឥណ្ឌាប្រចាំនៅកម្ពុជាបានមានប្រសាសន៍ថា ទំហំពាណិជ្ជកម្មរវាងកម្ពុជានិងឥណ្ឌា នៅឆ្នាំ២០២២ មានតម្លៃចំនួន២៨៩លានដុល្លារអាមេរិក មានការកើនឡើងបើធៀបនឹងឆ្នាំ២០២១ ដែលមានតម្លៃចំនួន ២៤០​លានដុល្លារ​អាមេរិកប៉ុណ្ណោះ។

លោកស្រីបានបន្តថា កម្ពុជា បាននាំចូលទំនិញពីឥណ្ឌានូវផលិតផលនានា ដូចជា ថ្នាំពេទ្យ, សាច់ក្របី, ម៉ូតូកង់បី, អំបោះ, ក្រណាត់, ស្បែក, អាហារប្រេង, ក្រណាត់កប្បាស, គីមីកសិកម្ម, អាគុយ មានតម្លៃចំនួន១៩៣លានដុល្លារ​អាមេរិក។ ចំណែកកម្ពុជា នាំចេញទៅឥណ្ឌាវិញមានដូចជា ប្រេងបន្លែ សរសៃអំបោះ កប្បាស គ្រឿងបន្លាស់ គ្រឿងអេឡិចត្រូនិច ស្បែកជើងកៅស៊ូ/ផ្ទាំងក្រណាត់ ស្បែកជើងស្បែក គ្រឿងម៉ាស៊ីនមានតម្លៃចំនួន ៩៦លាន​ដុល្លារអាមេរិក។

លោកស្រីឯកអគ្គរដ្ឋទួតឥណ្ឌាសង្ឃឹមថា ឆ្នាំ២០២៣នេះ ទំហំពាណិជ្ជកម្មរវាងកម្ពុជា និងឥណ្ឌា នឹងបន្តកើន​ឡើងជាបន្តបន្ទាប់ទៀត ខណៈបច្ចុប្បន្នមានក្រុមហ៊ុនឥណ្ឌាចំនួន៥០កំពុងធ្វើអាជីវកម្មនៅក្នុងប្រទេសកម្ពុជា ដោយផ្តោតទៅលើវិស័យអចលនទ្រព្យ ឱសថ ព័ត៌មានវិទ្យា ម៉ូតូកង់បីឥណ្ឌា និងការជីករករ៉ែមាស ជាដើម៕

អត្ថបទ៖ សំអឿន