ខេត្តបាត់ដំបង នឹងរៀបចំព្រឹត្តិការណ៍ធំ​ពិព័រណ៍ផលិតផលសក្តានុពល​របស់ខេត្តចំនួន៣ថ្ងៃ

សភាពាណិជ្ជកម្មកម្ពុជា សហការជាមួយសភាពាណិជ្ជកម្មខេត្តបាត់ដំបង និងរដ្ឋបាលខេត្ត​ នឹងរៀបចំពិព័រណ៍​ពាណិជ្ជកម្មកម្ពុជា ២០២៣ ក្រោមប្រធានបទ «យើងរួមគ្នាជំរុញទីផ្សារ ផលិតផលខេត្តបាត់ដំបង» រយៈពេលបីថ្ងៃ គឺចាប់ពីថ្ងៃទី ១០-១២ ខែ មីនា ឆ្នាំ ២០២៣ ខាងមុខ ដោយទទួលបានការអនុញ្ញាតពីក្រសួងពាណិជ្ជកម្ម គាំទ្រដោយ សហគ្រិនខ្មែរ នៃក្រសួងសេដ្ឋកិច្ច និងហិរញ្ញវត្ថុ។

បើតាមសភាពាណិជ្ជកម្មខេត្តបាត់ដំបង វេទិកានេះ នឹងជំរុញការផ្សព្វផ្សាយសក្តានុពលផលិផល កសិកម្ម ឧស្សាហកម្ម ពាណិជ្ជកម្ម ទេសចរណ៍ នៅក្នុងខេត្តបាត់ដំបងបន្ថែមទៀត។ ពិព័រណ៍នេះ នឹងរៀបចំនៅបរិវេន ផ្សារ ភួ ពុយ ខេត្តបាត់ដំបង។

សភាពាណិជ្ជកម្មខេត្តបានទទូចឱ្យភ្ញៀវជាតិ និងអន្តរជាតិចូលរួមឱ្យបានច្រើនកុះករ ដោយជួយទិញទំនិញ និងពិសាអាហារឆ្ងាញ់ៗ ជាច្រើននៅក្នុងពិព័រណ៍នេះ៕