CDC អនុម័តគម្រោងវិនិយោគចំនួន១៧ មានទុនជិត១០០លានដុល្លារ ក្នុងខែកម្ភៈ

ក្រុមប្រឹក្សាអភិវឌ្ឍន៍កម្ពុជាដែលហៅកាត់ថា(CDC) បានឱ្យដឹងថា នៅក្នុងខែកម្ភៈឆ្នាំ២០២៣ CDC បានអនុម័ត​គម្រោងវិនិយោគចំនួន១៧ក្រុមហ៊ុនមានទុនវិនិយោគចំនួន៩៨,៨លានដុល្លារអាមេរិក ដោយផ្តល់ឱកាស​ការងារ​ជូនដល់ប្រជាពលរដ្ឋចំនួន២២៧៨៤កន្លែង។

ចំនួននេះបើធៀបទៅនឹងខែកម្ភៈឆ្នាំ២០២២កន្លងទៅ ឃើញថា មានការកើនឡើងគួរឱ្យកត់សម្គាល់ ខណៈខែកម្ភៈ​ឆ្នាំ២០២២ CDC បានអនុម័តគម្រោងវិនិយោគចំនួន១២ ក្រុមហ៊ុនមានទុនវិនិយោគចំនួនជិត៩០លានដុល្លារអាមេរិក ដោយផ្តល់ឱកាសការងារជូនដល់ប្រជាពលរដ្ឋចំនួន១១៥៥៣កន្លែងប៉ុណ្ណោះ។

បើតាមរបាយការណ៍ប្រចាំថ្ងៃរបស់ក្រុមប្រឹក្សាអភិវឌ្ឍន៍កម្ពុជា បានឱ្យដឹងថា ក្នុងចំណោមក្រុមហ៊ុនចំនួន១៧នោះរួមមាន៖

១.គម្រោង បង្កើតរោងចក្រកាត់ដេរសម្លៀកបំពាក់ និងសម្ភារៈវេចខ្ចប់គ្រប់ប្រភេទនៅក្នុងតំបន់​សេដ្ឋកិច្ចពិសេស​ខេត្តស្វាយរៀង​​មានទុន៥លានដុល្លារនិងអាចបង្កើតការងារបាន៤០០កន្លែង។

២- គម្រោងបង្កើតរោងចក្រកាត់ដេរសម្លៀកបំពាក់នៅខេត្តតាកែវមានទុន៧លានដុល្លារ​និងអាចបង្កើតការងារបាន​៣.២៥៨កន្លែង។

៣-គម្រោងបង្កើតរោងចក្រផលិតសម្ភារៈវេចខ្ចប់ នៅខេត្តកំពង់ស្ពឺមានទុន៥,៥លានដុល្លារនិងអាចបង្កើតការងារបាន ១.០៧៦កន្លែង។

៤-គម្រោងបង្កើតរោងចក្រកាត់ដេរសម្លៀកបំពាក់នៅខេត្តកំពង់ស្ពឺមានទុន៥,១លានដុល្លារនិងអាចបង្កើតការងារ​បាន២.១៤៨កន្លែង។

៥- គម្រោងបង្កើតរោងចក្រផលិតស្បែកជើង និងគ្រឿងបន្សំស្បែកជើង នៅខេត្តកំពង់ស្ពឺមានទុន១៣,២លានដុល្លារ​និងអាចបង្កើតការងារបាន ២.៩៥៥កន្លែង។

៦- គម្រោងបង្កើតរោងចក្រផលិតកេសកាតុង និងសម្ភារៈវេចខ្ចប់ នៅ រាជធានីភ្នំពេញមានទុន៥,១លានដុល្លារ​និងអាចបង្កើតការងារបាន២៣៨កន្លែង។

៧- គម្រោងបង្កើតរោងចក្រកាត់ដេរសម្លៀកបំពាក់ និងវាយនភណ្ឌក្នុងផ្ទះ នៅខេត្តកំពង់ស្ពឺ មានទុន៦,៤លានដុល្លារ​និងអាចបង្កើតការងារបាន៥៣១កន្លែង។

៨- គម្រោងបង្កើតរោងចក្រផលិតស្បែកជើង នៅខេត្តកំពង់ស្ពឺ ក្នុងទុនវិនិយោគ៦,៤លានដុល្លារ​និងអាចបង្កើត​ការងារបាន១.៤៧៨កន្លែង។

៩-គម្រោងបង្កើតរោងចក្រផលិតកាបូប កាត់ដេរសម្លៀកបំពាក់ ខ្សែកាត ម៉ាស និងអៀម នៅខេត្តកំពង់ស្ពឺ ក្នុងទុនវិនិយោគ ៥,៨លានដុល្លារ​និងអាចបង្កើតការងារបាន១.២៦៣កន្លែង។

១០-គម្រោងបង្កើតរោងចក្រកាត់ដេរសម្លៀកបំពាក់ នៅរាជធានីភ្នំពេញ ក្នុងទុនវិនិយោគ៥,៥លាន​ដុល្លារ​និងអាចបង្កើតការងារបាន ២.៦១០កន្លែង។

១១-គម្រោងបង្កើតរោងចក្រកាត់ដេរសម្លៀកបំពាក់ នៅខេត្តកណ្តាល ក្នុងទុនវិនិយោគ៥,៥លានដុល្លារ​និងអាចបង្កើតការងារបាន ២.០៤៧កន្លែង។

១២-គម្រោងបង្កើតរោងចក្រផលិតកាបូបគ្រប់ប្រភេទ នៅ ខេត្តកំពង់ស្ពឺ ក្នុងទុនវិនិយោគ៥,៤លានដុល្លារ​និងអាចបង្កើតការងារបាន ២.១៣៥កន្លែង។

១៣-គម្រោងបង្កើតរោងចក្រផលិតកាបូបគ្រប់ប្រភេទ នៅខេត្តកំពង់ស្ពឺ ក្នុងទុនវិនិយោគ ៥,២លានដុល្លារ​និងអាចបង្កើតការងារបាន ៧៩៨កន្លែង។

១៤-គម្រោងបង្កើតរោងចក្រផលិតគ្រឿងបន្សំស្បែកជើងក្នុងរាជធានីភ្នំពេញ ក្នុងទុនវិនិយោគ៥,១​លានដុល្លារនិងអាចបង្កើតការងារបាន៧៩៨កន្លែង។

១៥-គម្រោងបង្កើតរោងចក្រផលិតគ្រឿងបង្គុំនៃគ្រឿងសង្ហារិមធ្វើពីលោហៈធាតុ នៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជី ខេត្តព្រះសីហនុ ក្នុងទុនវិនិយោគ៩លានដុល្លារនិងអាចបង្កើតការងារបាន៥០០កន្លែង។

១៦-គម្រោងបង្កើតរោងចក្រផលិតសម្ភារៈការិយាល័យ (ក្រូណូដាក់ឯកសារ) នៅក្នុងតំបន់សេដ្ឋកិច្ចពិសេស ក្រុងព្រះសីហនុ ខេត្តព្រះសីហនុ ក្នុងទុនវិនិយោគ៣លានដុល្លារនិងអាចបង្កើតការងារបាន ៣៥០កន្លែង។

១៧-គម្រោងបង្កើតរោងចក្រផលិតសម្ភារៈកីឡាធ្វើពីស្បែក និងក្រណាត់នៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ រាជធានីភ្នំពេញក្នុងទុនវិនិយោគ៦០០ពាន់ដុល្លារនិងអាចបង្កើតការងារបាន២០០កន្លែង៕

អត្ថបទ៖ សំអឿន