ក្រុមហ៊ុនជំនាញលើស្ថានីយសាករថយន្តអគ្គិសនីមកពីឡាវមានចំណាប់អារម្មណ៍វិនិយោគនៅកម្ពុជា

ក្រុមហ៊ុន LOCA ដែលជាក្រុមហ៊ុនជំនាញលើស្ថានីយសាករថយន្តអគ្គិសនីក្នុងប្រទេសឡាវបានបង្ហាញនូវចំណាប់អារម្មណ៍ចង់ចូលរួមវិនិយោគនៅប្រទេសកម្ពុជា ខណៈការប្រើប្រាស់រថយន្តអគ្គិសនីនៅកម្ពុជាកំពុងមានសន្ទុះកើនឡើង។

នៅក្នុងជំនួបជាមួយលោក ពៅ មាលី រដ្ឋលេខាធិការ ក្រសួងសាធារណការ និងដឹកជញ្ជូនកាលពីពេលថ្មីៗនេះ តំណាងក្រុមហ៊ុនក្រុមហ៊ុន LOCA បានលើកឡើងពីពីគោលបំណងរបស់ខ្លួនក្នុងការសិក្សាពីឱកាសវិនិយោគ ព្រមទាំងស្វែងយល់បន្ថែមពីច្បាប់ និងតម្រូវការឯកសារគតិយុត្តផ្សេងៗ អនុញ្ញាតឱ្យក្រុមហ៊ុនអាចត្រៀមខ្លួនបានរួចរាល់ សមស្របនឹងតម្រូវការក្នុងការវិនិយោគនៅកម្ពុជា។

ក្នុងជំនួបនេះ តំណាងក្រុមហ៊ុន LOCA បានធ្វើបទបង្ហាញពីព័ត៌មានសំខាន់ៗ និងទិសដៅរបស់ក្រុមហ៊ុនក្នុងការផ្ដល់ជូននូវសេវាកម្មផ្សេងៗជាចំណែកចូលរួមកាត់បន្ថយការបំភាយឧស្ម័នពុលចូលទៅស្រទាប់បរិយាកាស និងលើកកម្ពស់ការប្រើប្រាស់រថយន្តអគ្គិសនី ដោយក្រុមហ៊ុនក៏បានភ្ជាប់ផងដែរពីបច្ចុប្បន្នភាពនៃការប្រើប្រាស់រថយន្តអគ្គិសនីក្នុងសាធារណ​​រដ្ឋប្រជាធិបតេយ្យប្រជាមានិតឡាវ។

ជាការឆ្លើយតប លោក ពៅ មាលី បានយល់ព្រមក្នុងការសហការការងារបន្ត និងណែនាំបន្ថែមលើការរៀបចំឯកសារជាតម្រូវការចាំបាច់សម្រាប់ការវិនិយោគនៅកម្ពុជា ព្រមទាំងធ្វើការស្នើសុំឱ្យក្រុមហ៊ុនចែករំលែកនូវបច្ចេកវិទ្យាថ្មីៗមកកម្ពុជាសំដៅជំរុញលើកកម្ពស់ការប្រើប្រាស់យានយន្តអគ្គិសនី។

លោក ពៅ មាលី បានមានប្រសាសន៍ថា បច្ចុប្បន្នកម្ពុជាកំពុងលើកទឹកចិត្តប្រជាពលរដ្ឋក្នុងការប្រើប្រាស់យានយន្តអគ្គិសនី នឹងបើកឱកាសយ៉ាងទូលាយឱ្យវិនិយោគគិនអាចចូលមកវិនិយោគបន្ថែមលើវិស័យយានយន្តអគ្គិសនីនៅកម្ពុជាផងដែរ។

បើតាមលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូនធ្លាប់បានលើកឡើងថាបច្ចុប្បន្នមានស្ថានីយបញ្ចូលថាមពលយានយន្តអគ្គិសនីចំនួន ១៣ កន្លែង ដោយ៤កន្លែងនៅក្នុងបរិវេណទីស្ដីការក្រសួងសាធារណការ និងដឹកជញ្ជូន១កន្លែង នៅខេត្តព្រះសីហនុ ១ កន្លែងនៅខេត្តសៀមរាប ១ កន្លែងនៅខេត្តបាត់ដំបង និងស្ថានីយឯកជនមានចំនួន៦កន្លែង៕

អត្ថបទ៖ សំអឿន